ប្រភពការទូតរុស្ស៊ីមួយ បានប្រាប់សារព័ត៌មាន TASSថា កិច្ចប្រជុំកំពូលរវាងរុស្ស៊ី និងសហរដ្ឋអាមេរិក ពិតជាចាំបាច់ ប៉ុន្តែ ត្រូវតែមានការរៀបចំជាមុន និងដោយហ្មត់ចត់។ 

យោងតាមលោក ភាគីរុស្ស៊ីបាន «ពិនិត្យ និងវិភាគដោយប្រុងប្រយ័ត្ន» នូវបទសម្ភាសន៍របស់រដ្ឋមន្ត្រីការបរទេសអាមេរិក លោក Marco Rubio បន្ទាប់ពីកិច្ចប្រជុំរដ្ឋមន្ត្រីការបរទេសនៃក្រុមប្រទេស G7 ជាពិសេសសេចក្តីថ្លែងការណ៍របស់លោកអំពីការយោគយល់គ្នាទៅវិញទៅមករវាងសហរដ្ឋអាមេរិក និងរុស្ស៊ីអំពីតម្រូវការ ក្នុងការរៀបចំសម្រាប់កិច្ចប្រជុំកំពូលប្រកបដោយផលិតភាព។

អ្នកការទូតរុស្ស៊ីរូបនេះ បានបញ្ជាក់ថា៖«នេះ គឺជាអ្វីដែលប្រធានាធិបតីរុស្ស៊ី វ្ល៉ាឌីមៀ ពូទីន និង មេដឹកនាំអាមេរិក ដូណាល់ ត្រាំ បានព្រមព្រៀងគ្នា ក្នុងអំឡុងពេលនៃការសន្ទនាតាមទូរស័ព្ទរបស់ពួកគេ កាលពីថ្ងៃទី ១៦ ខែតុលា។ បញ្ហានៃកិច្ចប្រជុំថ្មីរវាងប្រធានាធិបតីទាំងពីរ ត្រូវបានពិភាក្សា នៅក្នុងបរិបទនេះ ដោយរដ្ឋមន្ត្រីការបរទេសរុស្ស៊ី សឺហ្គេ ឡាវរ៉ូវ (Sergey Lavrov)ក្នុងការសន្ទនាតាមទូរស័ព្ទជាមួយលោក Marco Rubio នៅថ្ងៃទី ២០ ខែតុលា។ កិច្ចប្រជុំកំពូលនេះ ពិតជាចាំបាច់ណាស់ ប៉ុន្តែវាត្រូវតែធ្វើឡើង ដោយមានការរៀបចំជាមុន និងយ៉ាងប្រុងប្រយ័ត្ន។ ទោះជាយ៉ាងណាក៏ដោយ ជំនួបនេះ អាចធ្វើទៅបាន លុះត្រាតែសហរដ្ឋអាមេរិកប្រកាន់ខ្ជាប់យ៉ាងខ្ជាប់ខ្ជួននូវកិច្ចព្រមព្រៀង Anchorage។ យើងជឿជាក់ថា ព័ត៌មានលម្អិតជាក់ស្តែងនៃកិច្ចប្រជុំរវាងប្រធានាធិបតីទាំងពីរ ត្រូវតែត្រូវបានធ្វើឡើង ក្នុងស្មារតីនៃការយោគយល់គ្នា ដែលសម្រេចបានកាលពីជំនួប នៅរដ្ឋអាឡាស្កា»៕