នៅពេលដែលប្រទេសថៃ បានកាត់ផ្តាច់ការផ្គត់ផ្គង់ថាមពលដល់ប្រទេសមីយ៉ាន់ម៉ា នៅតាមព្រំដែនភាគខាងលិចរបស់ខ្លួន នៅឆ្នាំនេះ ខ្លួនមានបំណងទប់ស្កាត់មជ្ឈមណ្ឌលឆបោកតាមអ៊ីនធឺណិត ដែលភ្ជាប់ទៅនឹងបណ្តាញក្នុងតំបន់ដែលជួញដូរមនុស្សរាប់រយរាប់ពាន់នាក់។

លោក Zaw ដែលជាអ្នកជួយសង្គ្រោះម្នាក់នៅក្នុងទីក្រុង Myawaddy ដែលស្ថិតនៅម្ខាងនៃព្រំដែនថៃ បាននិយាយថា ទោះជាយ៉ាងណាក៏ដោយ ការសម្រេចនេះ ក៏បានប៉ះពាល់ដល់សហគមន៍ទូលំទូលាយផងដែរ ដោយជំរុញឲ្យមន្ទីរពេទ្យ និងការិយាល័យមួយចំនួន ដំឡើងបន្ទះសូឡា។ ផ្ទះសម្បែងជាច្រើន ក៏បានផ្លាស់ប្តូរទៅប្រើថាមពលព្រះអាទិត្យផងដែរ។

លោក Zaw ដែលមិនចង់បង្ហាញឈ្មោះពេញរបស់ខ្លួន ដោយខ្លាចការសងសឹក បានបន្ថែមថា៖«មនុស្ស   បីនាក់ក្នុងចំណោម ៤នាក់ បច្ចុប្បន្ន ពឹងផ្អែកលើបន្ទះសូឡា ដោយអាជីវកម្មប្រើប្រាស់បន្ទះសូឡាកាន់តែច្រើន»។

ការផ្គត់ផ្គង់អគ្គិសនីរបស់ប្រទេសមីយ៉ាន់ម៉ា បានធ្លាក់ចុះយ៉ាងខ្លាំង ចាប់តាំងពីរដ្ឋប្រហារយោធាឆ្នាំ ២០២១ និងសង្គ្រាមស៊ីវិលដែលបានកើតឡើង ដែលធ្វើឲ្យមនុស្សរាប់លាននាក់ ប្រឈមនឹងការដាច់ចរន្តអគ្គិសនីរ៉ាំរ៉ៃ ដោយរដ្ឋាភិបាលដែលខ្វះថវិកា ហើយត្រូវរងផលប៉ះពាល់ដោយទណ្ឌកម្មរបស់លោកខាងលិច មិនអាចរក្សាហេដ្ឋារចនាសម្ព័ន្ធថាមពលបានទេ។

ធនាគារពិភពលោក បានប៉ាន់ប្រមាណថាសមត្ថភាពថាមពលប្រតិបត្តិការរបស់ប្រទេសនេះ បានធ្លាក់ចុះដល់កម្រិតឆ្នាំ ២០១៥ ក្នុងឆ្នាំ ២០២៤ ដោយពណ៌នាអំពីការផ្គត់ផ្គង់អគ្គិសនី នៅក្នុងតំបន់ដែលរងផលប៉ះពាល់ដោយជម្លោះថា ជា«មហន្តរាយ៕