យោងតាមការស្ទង់មតិថ្មីរបស់សារព័ត៌មានរ៉យទ័រ និងស្ថាប័នស្រាវជ្រាវ Ipsos បានឱ្យដឹងថា ម្ចាស់ឆ្នោតដែលជាសមាជិកគណបក្សប្រជាធិបតេយ្យ ហាក់ដូចជាបង្កើនសន្ទុះនៃអារម្មណ៍វិជ្ជមានច្រើនជាងសមាជិកគណបក្សសាធារណរដ្ឋ អំពីការបោះឆ្នោតសភាសហរដ្ឋអាមេរិក នៅឆ្នាំក្រោយនេះ បន្ទាប់ពីជ័យជម្នះរបស់ខ្លួនក្នុងការប្រកួតប្រជែងតាមរដ្ឋ និងតំបន់ នាពេលថ្មីៗ។

ការស្ទង់មតិរយៈពេល ៦ថ្ងៃ ដែលបិទកាលពីថ្ងៃពុធសប្ដាហ៍នេះ បានបង្ហាញថា អត្រា ៤៤% នៃអ្នកបោះឆ្នោតដែលហៅខ្លួនឯងថាជាសមាជិកបក្សប្រជាធិបតេយ្យ បាននិយាយថា ពួកគេមានអារម្មណ៍ "រំភើបខ្លាំងណាស់" ក្នុងការបោះឆ្នោតនៅថ្ងៃទី៣ ខែវិច្ឆិកា ឆ្នាំ២០២៦ បើធៀបនឹងអត្រាត្រឹមតែ ២៦% នៃអ្នកសាធារណរដ្ឋ ដែលនិយាយដូចគ្នានេះ។ អត្រា ៧៩% នៃអ្នកប្រជាធិបតេយ្យ និយាយថា ពួកគេនឹងស្តាយក្រោយបើមិនបានទៅបោះឆ្នោត ប្រៀបធៀបនឹងតួលេខ ៦៨% នៃអ្នកសាធារណរដ្ឋ។

គួរឱ្យដឹងថា អាសនៈទាំង ៤៣៥កៅអី នៅក្នុងសភាតំណាងរាស្រ្តអាមេរិក នឹងស្ថិតក្នុងការប្រកួតប្រជែងនៅឆ្នាំក្រោយ ក៏ដូចជា ៣៥អាសនៈនៅក្នុងព្រឹទ្ធសភាអាមេរិក ដែលមានសមាជិកសរុប ១០០អាសនៈ។ បច្ចុប្បន្ន គណបក្សសាធារណរដ្ឋមានសំឡេងភាគច្រើន ដែលគ្រប់គ្រងសភាទាំងពីរ។

អ្នកប្រជាធិបតេយ្យភាគច្រើន ស្ថិតក្នុងភាពស្រពិចស្រពិលចាប់តាំងពីលោក Donald Trump មកពីបក្សសាធារណរដ្ឋ បានឈ្នះឆ្នោតប្រធានាធិបតីកាលពីឆ្នាំមុន ប៉ុន្តែស្មារតីរបស់បក្សនេះបានរស់រានឡើងវិញ ក្នុងការបោះឆ្នោតកាលពីថ្ងៃទី៤ ខែវិច្ឆិកា កន្លងទៅ ដោយសារបក្សប្រជាធិបតេយ្យ បានឈ្នះក្នុងរដ្ឋធំៗដូចជារដ្ឋ Virginia និងរដ្ឋ New Jersey ក៏ដូចជានៅក្នុងតំណែងអភិបាលក្រុងញូវយ៉កផងដែរ៕