​បាល់ទាត់៖ ​ក្រុម​បិសាច​ក្រហម Manchester United ទទួល​បាន​ ៣ពិន្ទុ​ក្នុង​សប្តាហ៍​ទី​២៩ របស់​​ខ្លួន​នៅ​ក្រប​ខណ្ឌ English Premier League បន្ទាប់ពី​ជ័យជំនះ​ទាំង​លំបាក​លើ​ក្រុម​ភ្ញៀវ​ញញួរ​ធំ West Ham នៅ Old Trafford​។

​​ខ្សែការពារ​ខ្ចី​ជើង​ពី Watford, Craig Dawson បានរួម​ចំណែក​ជាច្រើន​ជួយ West Ham រដូវ​កាល​នេះ ​តែ​ប្រកួតនេះ​បែ​ជា​ភ្លាត់​ចូល​ទី​ខ្លួនឯង ​តាមរយៈ​បាល់​ជ្រុង​របស់ Bruno Fernandes​នៅ​វគ្គ​ទី២​។ ​​Marcus Rashford​ និង Mason Greenwood សុទ្ធតែ​មានឱកាស​ល្អ​រៀងៗ​ខ្លួន ​តែ​សុទ្ធតែ​មិនមាន​សំណាង​។​ ​​ជ័យជំនះ​នេះ​ធ្វើឲ្យ Manchester United បន្ត​ឈរ​លេខ២ មាន ៥៧ពិន្ទុ​ពីលើ​ក្រុម​លេខ៣ Leicester City ១ពិន្ទុ និង​ដេញ​ពីក្រោយ Manchester City ១៤ពិន្ទុ​តែ Manchester United នៅសល់​ ១ប្រកួត​ក្នុង​ដៃ​។​ ​​ជ័យជំនះ ១-០ នេះដែរ​ធ្វើឲ្យ Manchester United បិទ​មិនឲ្យ​របូត​បាល់ ៤ប្រកួត​ជាប់​គ្នា​ជា​លើកដំបូង ​ក្រោម​ការដឹកនាំ​របស់ Ole Gunnar Solskjaer​។​

​​ងាក​មក​ក្រុម​លេខ៣ Leicester City យប់មិញ​បាន​បំបាក់​ក្រុម​ដែល​កំពុង​ដុនដាប Sheffield United ដោយ​គ្រាប់​បាល់ ៣គ្រាប់​ម្នាក់ឯង​របស់ Kelechi Iheanacho និង​ ២គ្រាប់​ដោយ Ayoze Perez និង​គ្រាប់​ចូល​ទី​ខ្លួនឯង​របស់ Ampadu​។​ ​​ចំណែក​ក្រុម​កាំភ្លើង​ធំ Arsenal យប់មិញ​បាន​វាយបក​យកឈ្នះ Tottenham Hotspur ២-១​។ ​​Erik Lamela​ ស៊ុត​បញ្ចូល​ទី​នាំមុខ​ ដោយ​គ្រាប់​បាល់​បច្ចេកទេស​អស្ចារ្យ​របស់ខ្លួន​នៅ​នាទី​ទី៣៣ តែ​មុន​ចប់​វគ្គ​ទី១ Martin Odegaard​ តាម​ស្មើ​វិញ​នៅ​នាទី​ទី៤៤​។ ​​ចូល​វគ្គ​ទី២ គ្រាប់​បាល់​ជ័យជំនះ​របស់ Arsenal កើតឡើង​នៅ​នាទី​ទី៦៤ ដោយ​បាល់​ពិន័យ ១១ម៉ែត្រ​របស់ Alexander Lacazette ​បន្ទាប់ពី​កំហុស​របស់ Davinson Sanchez មុនពេល​ដែល Erik Lamela​ ទទួលបាន​កាត​ក្រហម​ទី២ បណ្តេញ​ចេញពី​ការប្រកួត​។​ ​៣​ពិន្ទុ​នេះ​ធ្វើឲ្យ Arsenal បន្ត​ឈរ​លេខ១០ មាន ៤១ពិន្ទុ ខណៈ Spurs របស់ Jose Mourinho ​នៅ​ឈរ​លេខ៧ មាន ៤៥ពិន្ទុ​ដេញ​ពីក្រោយ​តំបន់ Top4 ចំនួន ៦ពិន្ទុ​៕

​អត្ថបទ​៖​នាង សុភា​វុ​ធ