អតីតនាយករដ្ឋមន្ត្រីជប៉ុន លោក Shigeru Ishiba បានរិះគន់ការលើកឡើងនាពេលថ្មីៗនេះរបស់នាយករដ្ឋមន្ត្រីបច្ចុប្បន្ន លោកស្រី Sanae Takaichi ទាក់ទងនឹងកោះតៃវ៉ាន់ អំឡុងផ្ដល់បទសម្ភាសន៍តាមវិទ្យុ កាលពីថ្ងៃព្រហស្បតិ៍ (ទី១៣ ខែវិច្ឆិកា)។

នៅក្នុងកម្មវិធីរបស់វិទ្យុ TBS លោក Ishiba បាននិយាយថា ការអត្ថាធិប្បាយរបស់លោកស្រី Takaichi គឺសឹងតែជាការអះអាង ដែលថា ហេតុការណ៍កើតឡើងនាពេលខាងមុខ នៅកោះតៃវ៉ាន់ គឺជាហេតុការណ៍កើតឡើងនាពេលខាងមុខរបស់ប្រទេសជប៉ុន ដោយបញ្ជាក់បន្ថែមថា រដ្ឋាភិបាលមុនៗ តែងតែបានចៀសវាងជាប់ជានិច្ច ក្នុងការធ្វើសេចក្តីប្រកាសច្បាស់លាស់ អំពីរបៀបដែលរដ្ឋាភិបាលនឹងឆ្លើយតប ចំពោះសេណារីយោជាក់លាក់ ទាក់ទងនឹងបញ្ហាកោះតៃវ៉ាន់។

គួរបញ្ជាក់ថា អំឡុងសវនាការ នៅក្នុងអង្គនីតិបញ្ញត្តិរបស់ជប៉ុន កាលពីថ្ងៃទី៧ ខែវិច្ឆិកា លោកស្រី Takaichi បានអះអាងថា ភាពអាសន្ននៅកោះតៃវ៉ាន់ ពាក់ព័ន្ធនឹងការប្រើប្រាស់កងកម្លាំងយោធាចិនដីគោក អាចបង្កើតជា «ស្ថានភាពគំរាមកំហែងដល់ការរស់រានមានជីវិត» សម្រាប់ប្រទេសជប៉ុន។ យោងតាមច្បាប់ កងកម្លាំងស្វ័យការពាររបស់ជប៉ុន អាចអនុវត្តសិទ្ធិការពារស្វ័យការពាររួម ប្រសិនបើស្ថានភាពបែបនេះ ត្រូវបានទទួលស្គាល់ថា ជា «ការគំរាមកំហែងដល់ការរស់រានមានជីវិត»។

ហើយក្នុងអំឡុងពេលនៃការពិភាក្សា នៅអង្គនីតិបញ្ញត្តិ កាលពីថ្ងៃចន្ទ លោកស្រី Takaichi បានទទូចថា ការលើកឡើងរបស់លោកស្រី គឺស្របតាមទស្សនៈដ៏យូរអង្វែងរបស់រដ្ឋាភិបាល ហើយលោកស្រីមិនមានបំណងដកពាក្យសម្ដីនេះនោះទេ។

អ្នកនាំពាក្យក្រសួងការបរទេសចិន លោក Lin Jian បាននិយាយកាលពីថ្ងៃព្រហស្បតិ៍ថា អំឡុងសម័យប្រជុំ នៅអង្គនីតិបញ្ញត្តិ លោកស្រី Takaichi បានធ្វើការកត់សម្គាល់បង្កហេតុ ជុំវិញបញ្ហាកោះតៃវ៉ាន់ ដែលបង្ហាញនូវសញ្ញានៃលទ្ធភាពពីការធ្វើអន្តរាគមដោយប្រដាប់អាវុធនៅក្នុងច្រកសមុទ្រតៃវ៉ាន់។ ទោះបីជាមានការជំទាស់ និងការតវ៉ាយ៉ាងខ្លាំងជាផ្លូវការពីសំណាក់ប្រទេសចិនក៏ដោយ ក៏លោកស្រីនៅតែបដិសេធមិនផ្លាស់ប្តូរ និងដកចេញនូវអ្វីដែលលោកស្រីបាននិយាយនោះដែរ៕