ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃសុក្រ (ទី១៤ ខែវិច្ឆិកា) នេះថា រដ្ឋមន្ត្រីការបរទេសកូរ៉េខាងជើង លោកស្រី Choe Son Hui បានថ្កោលទោសសេចក្តីថ្លែងការណ៍រួមដែលចេញដោយក្រុមប្រទេសទាំង៧ (G7) ដោយបានបញ្ជាក់ថា លោកស្រីជំទាស់នឹងការជំរុញរបស់ប្លុកនេះដែលចង់ឲ្យប្រទេសកូរ៉េខាងជើងមិនមានអាវុធនុយក្លេអ៊ែរទាំងស្រុង។

គួរបញ្ជាក់ថា សេចក្តីថ្លែងការណ៍រួមដែលបានប្រកាសកាលពីថ្ងៃទី១២ ខែវិច្ឆិកា បន្ទាប់ពីមានការជួបប្រជុំនៃរដ្ឋមន្ត្រីការបរទេសរបស់ក្រុមនេះ នៅប្រទេសកាណាដា បានលើកឡើងថា ក្រុមប្រទេសទាំង២ ឬ G7 បានថ្កោលទោសកម្មវិធីអាវុធនុយក្លេអ៊ែររបស់កូរ៉េខាងជើង ហើយបានអះអាងឡើងវិញនូវការប្តេជ្ញាចិត្តរបស់ពួកគេ «ក្នុងការរំសាយទាំងស្រុងនូវអាវុធនុយក្លេអ៊ែរ » របស់ប្រទេសនេះ។

ដោយបានហៅសេចក្តីថ្លែងការណ៍នេះថា ជា «ទង្វើក្លែងបន្លំបង្កអរិភាព» លោកស្រី Choe បាននិយាយថា ការទាមទារបែបនេះ មិនអើពើនឹងរដ្ឋធម្មនុញ្ញរបស់ប្រទេសកូរ៉េខាងជើង។

លោកស្រី Choe ត្រូវបានដកស្រង់សម្តីដោយសារព័ត៌មាន KCNA ដែលបាននិយាយថា៖ «នៅក្នុងបរិយាកាសភូមិសាស្ត្រនយោបាយដ៏អាក្រក់ធ្ងន់ធ្ងរ នាពេលបច្ចុប្បន្ននេះ ការមានអាវុធនុយក្លេអ៊ែរ គឺជាជម្រើសដ៏ត្រឹមត្រូវបំផុត ក្នុងការរារាំងរដ្ឋដែលគ្រោះថ្នាក់ និងជាអរិភាពបំផុត»៕