ក្រុមមន្ត្រីបានប្រាប់ឲ្យដឹងថា អាហ្វហ្គានីស្ថានដែលជាប្រទេសគ្មានព្រំដែនសមុទ្រ កំពុងពឹងផ្អែកខ្លាំងលើផ្លូវពាណិជ្ជកម្មឆ្លងកាត់អ៊ីរ៉ង់ និងអាស៊ីកណ្តាល ដើម្បីកាត់បន្ថយការពឹងផ្អែកលើប៉ាគីស្ថាន ខណៈដែលភាពតានតឹង រវាងប្រទេសជិតខាងទាំង២ កើនឡើង ដោយព្រំដែនត្រូវបានបិទក្នុងប៉ុន្មានសប្តាហ៍ថ្មីៗនេះ។

ការពឹងផ្អែករបស់អាហ្វហ្គានីស្ថានលើកំពង់ផែរបស់ប៉ាគីស្ថាន បានផ្តល់ឲ្យទីក្រុងអ៊ីស្លាម៉ាបាដនូវឥទ្ធិពលជាយូរយារណាស់មកហើយ ដើម្បីដាក់សម្ពាធទីក្រុងកាប៊ុល ជុំវិញការលាក់ខ្លួនរបស់ក្រុមសកម្មប្រយុទ្ធប៉ាគីស្ថាន ឆ្លងកាត់ព្រំដែន។

ប៉ុន្តែអាហ្វហ្គានីស្ថានកំពុងប្រើប្រាស់សម្បទានរបស់អ៊ីរ៉ង់កាន់តែខ្លាំងឡើងៗ ដើម្បីផ្លាស់ប្តូរការដឹកជញ្ជូនទំនិញទៅកាន់កំពង់ផែរបស់ខ្លួនដែលគាំទ្រដោយឥណ្ឌា គឺ Chabahar ដោយគេចពីប៉ាគីស្ថាន ហើយចៀសវាងការការបិទព្រំដែន និងរំខានការឆ្លងកាត់ដដែលៗ។

អ្នកនាំពាក្យក្រសួងពាណិជ្ជកម្ម លោក Abdul Salam Jawad Akhundzada បានប្រាប់សារព័ត៌មាន Reuters ថា៖ «ក្នុងរយៈពេល ៦ខែកន្លងមកនេះ ពាណិជ្ជកម្មរបស់យើងជាមួយអ៊ីរ៉ង់ បានឈានដល់កម្រិត ១,៦ពាន់លានដុល្លារ ដោយខ្ពស់ជាង ១,១ពាន់លានដុល្លារដែលបានដោះដូរជាមួយប៉ាគីស្ថាន»។

លោក Mullah Abdul Ghani Baradar ឧបនាយករដ្ឋមន្ត្រីអាហ្វហ្គានីស្ថានទទួលបន្ទុកកិច្ចការសេដ្ឋកិច្ច បាននិយាយថា ពាណិជ្ជករមានពេល ៣ខែ ដើម្បីទូទាត់កិច្ចសន្យា នៅក្នុងប្រទេសប៉ាគីស្ថាន និងប្តូរទៅកាន់ផ្លូវផ្សេង។

ដោយចោទប្រកាន់ទីក្រុងអ៊ីស្លាម៉ាបាដថា បានប្រើប្រាស់ «បញ្ហាពាណិជ្ជកម្ម និងមនុស្សធម៌ ដើម្បីកេងចំណេញនយោបាយ» លោកឧបនាយករដ្ឋមន្ត្រីបាននិយាយថា អាហ្វហ្គានីស្ថាននឹងមិនសម្របសម្រួលជម្លោះបន្ទាប់ពីមានកាលបរិច្ឆេទកំណត់ ហើយបានបញ្ជាឲ្យក្រសួងបញ្ឈប់ផ្ដល់ការអនុញ្ញាតដល់ឱសថប៉ាគីស្ថាន ដោយលើកឡើងពីការនាំចូល «គុណភាពទាប»៕