ការស្ទង់មតិរបស់ Reuters/Ipsos បានរកឃើញថា មានតែជនជាតិអាមេរិក ២៩ភាគរយប៉ុណ្ណោះដែលគាំទ្រការប្រើប្រាស់កម្លាំងយោធារបស់សហរដ្ឋអាមេរិក ដើម្បីសម្លាប់អ្នកដែលត្រូវបានសង្ស័យជួញដូរគ្រឿងញៀន ដោយគ្មានចៅក្រម ឬតុលាការពាក់ព័ន្ធ ជាការបដិសេធ ចំពោះការវាយប្រហាររបស់លោកប្រធានាធិបតី Donald Trump នៅតំបន់ការ៉ាអ៊ីប និងមហាសមុទ្រប៉ាស៊ីហ្វិកភាគខាងកើត។

ការស្ទង់មតិរយៈពេល ៦ថ្ងៃដែលបានបិទបញ្ចប់កាលពីថ្ងៃពុធ ខណៈដែលទីក្រុងវ៉ាស៊ីនតោន បានបន្តបង្កើនកម្លាំងយោធា នៅជុំវិញតំបន់អាមេរិកឡាទីនដែលផ្តោតជាពិសេសលើវ៉េណេស៊ុយអេឡា បានបង្ហាញថា ៥១ភាគរយ បានប្រឆាំងនឹងការសម្លាប់ជនសង្ស័យគ្រឿងញៀន ហើយអ្នកនៅសល់ផ្សេង មិនមានជំហរប្រាកដប្រជានោះឡើយ។

ជាសញ្ញានៃការបែកបាក់ នៅក្នុងរង្វង់គណបក្សរបស់លោក Trump ២៧ភាគរយនៃគណបក្សសាធារណរដ្ឋ នៅក្នុងការស្ទង់មតិ បានជំទាស់នឹងការអនុវត្តនេះ ខណៈដែល ៥៨ភាគរយ គាំទ្រចំណាត់ការនេះ ដោយនៅសល់ពីនោះមិនប្រាកដប្រាជា។ ៣ភាគ៤នៃអ្នកប្រជាធិបតេយ្យ បានជំទាស់នឹងការអនុវត្តនេះ បើប្រៀបធៀបទៅនឹងមនុស្សម្នាក់ ក្នុងចំណោម ១០នាក់ ដែលគាំទ្រការធ្វើបែបនេះ។

គួរបញ្ជាក់ថា រដ្ឋបាលរបស់លោក Trump បានបញ្ជាឲ្យមានការវាយប្រហារយោធាយ៉ាងហោចណាស់ចំនួន ២០លើក ក្នុងរយៈពេលប៉ុន្មានខែថ្មីៗនេះ ប្រឆាំងនឹងនាវាដែលសង្ស័យថា មានគ្រឿងញៀន នៅតំបន់ការ៉ាអ៊ីប និងនៅម្ដុំឆ្នេរប៉ាស៊ីហ្វិកនៃតំបន់អាមេរិកឡាទីន ដោយបានសម្លាប់មនុស្សយ៉ាងហោចណាស់ ៧៩នាក់៕