ទូរទស្សន៍រដ្ឋចិន CCTV រាយការណ៍ថា នៅថ្ងៃសុក្រនេះ អវកាសយានិកចិន ៣រូប បានវិលត្រឡប់មកកាន់ផែនដីវិញហើយ ក្រោយការចុះចតពន្យាពេលបណ្តាលមកពីកម្ទេចកម្ទីអវកាសវាយប្រហារយានរបស់ពួកគេកាលពីសប្តាហ៍មុន ។

ទីភ្នាក់ងារអវកាសចិន CMSA និយាយថា អវកាសយានិក បានចាកចេញពីស្ថានីយអវកាស Tiangong ធ្វើដំណើរលើយាន Shenzhou-21 និងបានចុះចតដល់ផែនដីនៅវេលាម៉ោង ៤ និង ៤០នាទីល្ងាច ម៉ោងក្នុងស្រុក ថ្ងៃសុក្រ ត្រូវនឹងម៉ោង ៨ និង ៤០នាទី ម៉ោងសកល នៅទីតាំងចុះចត Dongfeng ស្ថិតតំបន់ម៉ុងហ្គោលីខាងក្នុង ។

នៅក្នុងបទសម្ភាសន៍ជាមួយទូរទស្សន៍ CCTV បន្ទាប់ពីការចុះចត មេបញ្ចាការយាន Shenzhou-21 លោក Chen Dong បាននិយាយរៀបរាប់ថា បេសកកម្មរយៈពេល ៦ខែរបស់ពួកគេនៅស្ថានីយ Tiangong បានជោគជ័យ ខណៈទទួលស្គាល់ថា ការងារនៅទីអវកាសប្រកបដោយការលំបាក និងការងារប្រឈមជាច្រើន ។

លោក Chen និយាយថា ឧបទ្ទេវហេតុកម្ទេចកម្ទី និងការពន្យាពេលចុះចត គឺជាឱកាសមួយដើម្បីសិក្សាបន្ថែមទៀត និងការធ្វើតេស្តសមត្ថភាពរបស់ពួកគេ ។

សូមបញ្ជាក់ថា អវកាសយានិកចិនទាំង ៣រូប គ្រោងនឹងធ្វើដំណើរមកកាន់ផែនដីវិញកាលពីរយៈពេល ៩ថ្ងៃមុន ក្រោយបញ្ចប់បេសកកម្មរយៈពេល ៦ខែ នៅស្ថានីយអវកាសគ្មានមនុស្សនៅអចិន្រ្តៃយ៍ Tiangong របស់ចិន ដែលគេស្គាល់ថាជាបេសកកម្ម “Shenzhou” ឬ “Divine Vessel” ពេលដែលស្នាមប្រេះត្រូវបានរកឃើញនៅលើយានរបស់ពួកគេ ៕