សេតវិមានបាននិយាយថា ប្រធានាធិបតីសហរដ្ឋអាមេរិក លោក Donald Trump កាលពីថ្ងៃសុក្រ ទី១៤ ខែវិច្ឆិកា បានចុះហត្ថលេខាលើក្រឹត្យមួយ ដើម្បីលើកលែងការនាំចូលអាហារជាច្រើនមុខ រួមមានសាច់គោ ប៉េងប៉ោះ កាហ្វេ និងផ្លែចេក ពីការដំឡើងពន្ធដែលបានដាក់កាលពីដើមឆ្នាំនេះលើស្ទើរតែគ្រប់ប្រទេសទាំងអស់។

ក្រឹត្យនេះគឺជាផ្នែកមួយនៃការជំរុញដ៏សំខាន់ធ្វើឡើងដោយលោក Trump និងមន្ត្រីជាន់ខ្ពស់របស់លោកដើម្បីដោះស្រាយការព្រួយបារម្ភដែលកំពុងកើនឡើងរបស់ពលរដ្ឋអាមេរិកអំពីតម្លៃគ្រឿងទេសកើនឡើងខ្ពស់ជាបន្តបន្ទាប់។

ការលើកលែងថ្មីនេះ ដែលបានចូលជាធរមាន បង្ហាញពីការប្រែក្រឡាស់សម្រាប់ លោក Trump ដែលបានទទូចជាយូរមកហើយថា ពន្ធនាំចូលរបស់លោកមិនជំរុញឱ្យមានអតិផរណាទេ។ 

លោក Trump បានពង្រឹងប្រព័ន្ធពាណិជ្ជកម្មសកលដោយការដំឡើងពន្ធជាមូលដ្ឋាន១០ភាគរយលើការនាំចូលពីគ្រប់ប្រទេស បូករួមទាំងពន្ធជាក់លាក់បន្ថែមដែលប្រែប្រួលពីរដ្ឋមួយទៅរដ្ឋមួយ។

ក្រឹត្យកាលពីថ្ងៃសុក្រ បានធ្វើឡើងតាមកិច្ចព្រមព្រៀងពាណិជ្ជកម្មក្របខ័ណ្ឌដែលបានប្រកាសកាលពីថ្ងៃព្រហស្បតិ៍ថានឹងលុបចោលការដំឡើងពន្ធលើអាហារមួយចំនួន និងទំនិញផ្សេងទៀតដែលនាំចូលពីប្រទេសអាហ្សង់ទីន អេក្វាឌ័រ ហ្គាតេម៉ាឡា និងអែលសាល់វ៉ាឌ័រ នៅពេលដែលកិច្ចព្រមព្រៀងទាំងនោះត្រូវបានបញ្ចប់ចុងក្រោយដោយមន្ត្រីសហរដ្ឋអាមេរិកដែលនឹងសម្លឹងមើលកិច្ចព្រមព្រៀងបន្ថែមសម្រាប់ការចុះហត្ថលេខានៅមុនដំណាច់ឆ្នាំនេះ។