រុស្ស៊ី៖ ក្រសួងការពារជាតិរុស្ស៊ីកាលពីថ្ងៃចន្ទបានបញ្ចេញវីដេអូ របស់កងទ័ពមកពីតំបន់យោធាភាគខាងត្បូងដែលកំពុងហ្វឹកហាត់ ជាមួយនឹងកាំភ្លើងត្បាល់អំឡុងពេលសមយុទ្ធយោធានៅតំបន់គ្រីមៀ។ សមយុទ្ធប្រយុទ្ធនៅទីលានហ្វឹកហ្វឺនតំបន់ Opuk បានធ្វើឡើងជាផ្នែកមួយនៃជំរំប្រមូលផ្ដុំនៃអង្គភាពបាញ់គ្រាប់រ៉ុក្កែត និងកាំភ្លើងធំ។
កងទ័ពបានបាញ់កាំភ្លើងត្បាល់ ៨២មីល្លីម៉ែត្រ និង ១២០មីល្លីម៉ែត្រទៅលើទីតាំងរបស់សត្រូវនៅក្នុងទីតាំង និងតំបន់បើកចំហ។ ប្រទេសរុស្ស៊ីបានបង្កើនសមយុទ្ធយោធារបស់ខ្លួន ក្នុងពេលមានភាពតានតឹងជាមួយប្រទេសអ៊ុយក្រែន ដោយមន្ត្រីអាមេរិកបានរាយការណ៍ថា ការវាយប្រហារដោយទីក្រុងមូស្គូមកលើប្រទេសជិតខាងរបស់ខ្លួននឹងជិតមកដល់។ វិមានក្រឹមឡាំងបានផ្តល់សញ្ញាកាលពីថ្ងៃចន្ទថា ខ្លួនបានត្រៀមខ្លួនជាស្រេចក្នុងការបន្តការពិភាក្សាជាមួយប្រទេសលោកខាងលិច អំពីការព្រួយបារម្ភផ្នែកសន្តិសុខដែលរួមមានទាំងការចង់បានរបស់ខ្លួនឲ្យមានការធានាថា អង្គការណាតូនឹងមិនអនុញ្ញាតឱ្យប្រទេសអ៊ុយក្រែន និងប្រទេសអតីតសហភាពសូវៀតចូលរួមជាសមាជិកឡើយ។
ក្រសួងការពារជាតិបេឡារុស្សកាលពីថ្ងៃចន្ទបានចេញផ្សាយវីដេអូ ដែលបង្ហាញពីក្បួនរថយន្តយោធាកំពុងត្រូវបានផ្លាស់ប្តូរទីតាំង ជាផ្នែកនៃសមយុទ្ធរួមរបស់រុស្ស៊ី និងបេឡារុស្ស។ រថក្រោះ និងរថពាសដែកជាង ៣០០គ្រឿងត្រូវបានផ្លាស់ប្តូរពីកន្លែងហ្វឹកហាត់តំបន់ Osipovichi ទៅកាន់តំបន់ហ្វឹកហាត់ប្រយុទ្ធក្នុងតំបន់ Gomel។ គ្រឿងយុទ្ធោបករណ៍ត្រូវបានផ្លាស់ប្តូរដោយផ្នែក ដោយមានជំនួយពីអង្គភាពដឹកជញ្ជូនចំនួន ៦០អង្គភាព។ ក្រសួងការពារជាតិរុស្ស៊ីបានបញ្ចេញវីដេអូ បង្ហាញពីទាហានមកពីអង្គភាពកងម៉ារីនក្នុងការហ្វឹកហ្វឺន ក្នុងសង្គ្រាមនៅទីក្រុងនៅទីលានហ្វឹកហាត់តំបន់ Obuz-Lesnovsky។ មន្ត្រីអាមេរិកបានរាយការណ៍អំពីការវាយប្រហាររបស់រុស្ស៊ីលើ អ៊ុយក្រែនជិតមកដល់ ហើយសមយុទ្ធដែលនឹងដំណើរការរហូតដល់ថ្ងៃអាទិត្យ អាចត្រូវបានប្រើប្រាស់ដោយទីក្រុងមូស្គូជាការបិទបាំង សម្រាប់ការឈ្លានពានពីភាគខាងជើង៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
