កងរក្សាសន្តិភាពរបស់អង្គការសហប្រជាជាតិ បាននិយាយកាលពីថ្ងៃសុក្រទី១៤ ខែវិច្ឆិកាថា កងទ័ពរបស់អ៊ីស្រាអែលបានសាងសង់ជញ្ជាំងនៅភាគខាងត្បូងប្រទេសលីបង់ ជិតខ្សែបន្ទាត់ខៀវដែលកំណត់ដោយអង្គការសហប្រជាជាតិ ជាព្រំដែនជាក់ស្តែង ខណៈអ៊ីស្រាអែលបានច្រានចោលការចោទប្រកាន់នេះ។ កងកម្លាំងបណ្តោះអាសន្នរបស់អង្គការសហប្រជាជាតិនៅក្នុងប្រទេសលីបង់ ដែលបាននិងកំពុងធ្វើការជាមួយកងទ័ពលីបង់ដើម្បីបង្រួបបង្រួមបទឈប់បាញ់រវាងអ៊ីស្រាអែល និងក្រុមសកម្មប្រយុទ្ធលីបង់ ហេសបូឡា ដែលបានឈានដល់កាលពីខែវិច្ឆិកាឆ្នាំមុន ដោយបានចាត់ទុកទង្វើនេះថាជាការរំលោភលើដែនអធិបតេយ្យភាពរបស់ប្រទេសលីបង់។

កងកម្លាំងបណ្តោះអាសន្នរបស់អង្គការសហប្រជាជាតិនៅក្នុងប្រទេសលីបង់ បាននិយាយនៅក្នុងសេចក្តីថ្លែងការណ៍មួយថា កាលពីខែតុលា ខ្លួនបានធ្វើការស្ទង់មតិ «ជញ្ជាំងបេតុង T-wall ដែលត្រូវបានសាងសង់ដោយកងកម្លាំងការពារអ៊ីស្រាអែល (IDF))នៅភាគនិរតីទីក្រុង Yaroun ។ ការស្ទង់មតិបានបញ្ជាក់ថា ជញ្ជាំងនេះបានឆ្លងកាត់ខ្សែបន្ទាត់ខៀវ ដែលធ្វើឱ្យទឹកដីលីបង់ជាង៤.០០០ម៉ែត្រក្រឡា មិនអាចឲ្យប្រជាជនលីបង់ចូលទៅបាន។

សេចក្តីថ្លែងការណ៍និយាយថា «នៅក្នុងខែវិច្ឆិកា កងរក្សាសន្តិភាពបានសង្កេតឃើញការសាងសង់ជញ្ជាំង T-wall បន្ថែមទៀតនៅក្នុងតំបន់នោះ។ 

នៅពេលត្រូវបានសួរដោយសារព័ត៌មានអំពីការចោទប្រកាន់នេះ យោធាអ៊ីស្រាអែលបាននិយាយថា «ជញ្ជាំងនេះគឺជាផ្នែកមួយនៃផែនការដ៏ទូលំទូលាយរបស់យោធាអ៊ីស្រាអែល ដែលការសាងសង់បានចាប់ផ្តើមនៅឆ្នាំ២០២២។