ប្រធានាធិបតីសហរដ្ឋអាមេរិក លោក Donald Trump បាននិយាយថា លោកជឿជាក់ថា ប្រទេសថៃ និងកម្ពុជា «នឹងមានភាពល្អប្រសើរ» ក្រោយពីបានសន្ទនាតាមទូរស័ព្ទជាមួយមេដឹកនាំនៃប្រទេសទាំងពីរ ដើម្បីជួយសម្របសម្រួលការផ្ទុះឡើងជម្លោះរវាងប្រទេសទាំងពីរកាលពីពេលថ្មីៗនេះ។

ប្រទេសថៃ ក្នុងសប្តាហ៍នេះ បានផ្អាកកិច្ចព្រមព្រៀងបទឈប់បាញ់ដែលសម្របសម្រួលដោយសហរដ្ឋអាមេរិក ជុំវិញការចោទប្រកាន់ថា កម្ពុជាបានដាក់គ្រាប់មីនថ្មី ដែលបញ្ហានេះកម្ពុជាបានបដិសេធយ៉ាងដាច់ខាត។

លោក Trump បានប្រាប់អ្នកសារព័ត៌មានថា «ខ្ញុំបាននិយាយទៅកាន់នាយករដ្ឋមន្ត្រីនៃប្រទេសទាំងពីរ ហើយមេដឹកនាំទាំងពីរធ្វើបានល្អ។ ខ្ញុំគិតថានឹងមានភាពប្រសើរ»។

នៅក្នុងបទសម្ភាសន៍ជាមួយបណ្តាញផ្សព្វផ្សាយ GB News របស់អង់គ្លេសកាលពីថ្ងៃសុក្រ លោកបាននិយាយសំដៅទៅលើជម្លោះពិភពលោក និងបាននិយាយថា «ខ្ញុំគិតថា ខ្ញុំបានដោះស្រាយបញ្ហាមួយនៅថ្ងៃនេះ» ដោយពុំបបានផ្តល់ព័ត៌មានលម្អិតបន្ថែមនោះទេ។

មន្ត្រីសេតវិមានបាននិយាយថា លោក Trump ក៏បានចូលរួមជាមួយប្រទេសម៉ាឡេស៊ី កាលពីថ្ងៃសុក្រ។

ភាពតានតឹងដែលអូសបន្លាយរយៈពេលយូរ ជុំវិញជម្លោះព្រំដែនរវាងប្រទេសអាស៊ីអាគ្នេយ៍ទាំងពីរ បានផ្ទុះឡើងរយៈពេលប្រាំថ្ងៃនៃការប្រយុទ្ធគ្នាកាលពីខែកក្កដា មុនពេលលោក Trump និងនាយករដ្ឋមន្ត្រីម៉ាឡេស៊ី លោក Anwar Ibrahim សម្របសម្រួលឲ្យមានបទឈប់បាញ់។