ភ្នំពេញ៖ អាជ្ញាធរខេត្តព្រះវិហារ បានអះអាងថា បញ្ហាបទល្មើសការលួចកាប់ទន្ទ្រានព្រៃឈើ នៅក្នុងខេត្តព្រះវិហារ មានការថយចុះគួរឲ្យកត់សម្គាល់ ខណៈអ្នកប្រព្រឹត្តិល្មើស តែងត្រូវបានធ្វើការអប់រំ និងបញ្ជូនទៅតុលាការ ចាត់ការតាមនីតិវិធីច្បាប់

ក្នុងសន្និសីទសារព័ត៌មានស្តីពី វឌ្ឍនភាពមូលដ្ឋានឃុំសង្កាត់ និងលើកទិសដៅអនុវត្តបន្ត​របស់​ខេត្តព្រះវិហារ ​នៅថ្ងៃទី១៥ ខែកុម្ភៈ ឆ្នាំ២០២២ នាទីស្ដីការគណៈរដ្ឋមន្ត្រី លោក អ៊ុង វុទ្ធី អភិបាលរង​ខេត្តព្រះវិហារ មានប្រសាសន៍ថា ព្រៃឈើនៅក្នុងខេត្តព្រះវិហារ កំពុងគ្រប់គ្រងដោយ​ក្រសួង​បរិស្ថាន និងក្រសួងកសិកម្មរុក្ខាប្រមាញ់ ​និងនេសាទ គឺគ្រាន់តែស្ថិតក្នុងដែនបរិស្ថាន​មាន​រហូត​ដល់​ប្រមាណ ១លានហិកតា ។

លោក បានបន្តថា ក្នុងដែនព្រៃការពារទាំងអស់នោះ តែងកើតមាននូវបទល្មើសព្រៃឈើ ប៉ុន្តែ​អាជ្ញាធរ និងអ្នកពាក់ព័ន្ធដែលប្រចាំការទីនោះ ​បានធ្វើការទប់ស្កាត់ ​និងបង្ក្រាបជាបន្តបន្ទាប់ ហើយ​ក៏​មានបញ្ជូនទៅតុលាការ នូវបទល្មើសធំៗផងដែរ ។

លោក អ៊ុង វុទ្ធី បានបញ្ជាក់ថា ក្រៅពីបញ្ហាបទល្មើសព្រៃឈើថយចុះ ចំពោះការលួចបរបាញ់សត្វព្រៃ ក៏មានការថយចុះផងដែរ ​ដោយពលរដ្ឋបានយល់ដឹងច្រើន ​ពីការអភិរក្សថែរក្សាសត្វព្រៃ ទុក​ដើម្បី​បម្រើ​ដល់វិស័យទេសចរណ៍ ​ដែលពួកគាត់អាចរកប្រាក់ចំណូលពីវិស័យនេះ ហើយសម្រាប់អ្នក​ប្រព្រឹត្ត​ល្មើសវិញ ក៏ត្រូវបានឃាត់ខ្លួនធ្វើការអប់រំ ​ប៉ុន្តែមិនមានការផ្ដន្ទាទោសអ្វីនោះទេ ។

ជាមួយគ្នានេះ លោកអភិបាលរង បានអំពាវនាវដល់ប្រជាពលរដ្ឋ បន្តជួយថែរក្សាការពារព្រៃឈើ និងសត្វព្រៃ ​មិនថាតែនៅក្នុងខេត្តព្រះវិហារ ​គឺនៅទូទាំងប្រទេស​ ដើម្បីបម្រើដល់វិស័យទេសចរណ៍ ឬ​ផលប្រយោជន៍ផ្សេងៗទៀត ៕