ក្រុមអ្នកការទូត បានឲ្យដឹងថា ក្រុមប្រឹក្សាសន្តិសុខអង្គការសហប្រជាជាតិ (UNSC) នឹងបោះឆ្នោតនៅថ្ងៃចន្ទសប្ដាហ៍ក្រោយ ពាក់ព័ន្ធនឹងសេចក្ដីសម្រេចដែលគាំទ្រដល់ផែនការសន្តិភាពហ្កាហ្សារបស់លោកប្រធានាធិបតីអាមេរិក Donald Trump។

កាលពីសប្តាហ៍មុន សហរដ្ឋអាមេរិកបានចាប់ផ្តើមកិច្ចពិភាក្សាជាផ្លូវការ នៅក្នុងក្រុមប្រឹក្សាសន្តិសុខដែលមានសមាជិក ១៥ប្រទេស លើឯកសារដែលនឹងតាមដានបទឈប់បាញ់ ក្នុងសង្រ្គាមរយៈពេល ២ឆ្នាំ រវាងអ៊ីស្រាអែល និងក្រុមហាម៉ាស និងគាំទ្រផែនការរបស់លោក Trump។

សេចក្តីព្រាងនៃសេចក្ដីសម្រេចដែលត្រូវបានឃើញដោយសារព័ត៌មាន កាលពីថ្ងៃព្រហស្បតិ៍ «ស្វាគមន៍ការបង្កើតក្រុមប្រឹក្សាសន្តិភាព» ជាស្ថាប័នគ្រប់គ្រងអន្តរកាល សម្រាប់តំបន់ហ្កាហ្សា ដែលលោក Trump នឹងធ្វើជាប្រធាន ដោយមានអាណត្តិគ្រប់គ្រងរហូតដល់ចុងឆ្នាំ២០២៧។

ផែនការនោះនឹងអនុញ្ញាតឲ្យរដ្ឋជាសមាជិកបង្កើត «កងកម្លាំងរក្សារស្ថិរភាពអន្តរជាតិបណ្តោះអាសន្ន (ISF)» ដែលនឹងធ្វើការជាមួយអ៊ីស្រាអែល និងអេហ្ស៊ីប និងនគរបាលប៉ាឡេស្ទីនដែលទើបបណ្តុះបណ្តាលថ្មី ដើម្បីជួយធានាតំបន់ព្រំដែន និងធ្វើឲ្យគ្មានយោធា នៅតំបន់ហ្កាហ្សាស្ទ្រីប។

មិនដូចសេចក្តីព្រាងកាលពីមុននោះទេ ឯកសារចុងក្រោយបំផុតនេះ និយាយដល់លទ្ធភាពនៃការមានរដ្ឋប៉ាឡេស្ទីនមួយ នាពេលអនាគត។ កាលពីថ្ងៃសុក្រ សហរដ្ឋអាមេរិក និងបណ្ដាប្រទេសអារ៉ាប់ និងមូស្លីមភាគច្រើន រួមទាំងមានអេហ្ស៊ីប អារ៉ាប៊ីសាអ៊ូឌីត និងទួរគីផងដែរ បានអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិ (UNSC) អនុម័តសេចក្ដីសម្រេចនេះឲ្យបានឆាប់រហ័ស៕