សារព័ត៌មាន Kyodo News បានរាយការណ៍នៅថ្ងៃសៅរ៍ (ទី១៥ ខែវិច្ឆិកា) នេះថា ប្រទេសជប៉ុនកំពុងពិចារណាកែសម្រួលគោលការណ៍មិនមានអាវុធនុយក្លេអ៊ែរ ៣ចំណុចដ៏យូរអង្វែងរបស់ខ្លួន ជាការវិវត្តដែលបាននាំឲ្យមានការរិះគន់យ៉ាងខ្លាំងពីក្រសួងការបរទេសចិន ដែលបានព្រមានថា វិធានការនេះបញ្ជូននូវ «សញ្ញាគ្រោះថ្នាក់» ដល់សហគមន៍អន្តរជាតិ។

យោងតាមសារព័ត៌មាន Kyodo ដែលបានដកស្រង់ប្រភពជាច្រើនរបស់រដ្ឋាភិបាល បានឲ្យដឹងថា នាយករដ្ឋមន្ត្រី លោកស្រី Sanae Takaichi កំពុងស្វែងរកនូវលទ្ធភាពកែប្រែ ដែលជាផ្នែកមួយនៃផែនការផ្លាស់ប្តូរយុទ្ធសាស្ត្រសន្តិសុខជាតិរបស់ជប៉ុន និងឯកសារសន្តិសុខពាក់ព័ន្ធចំនួន ២។ ការពិនិត្យឡើងវិញនេះត្រូវបានរាយការណ៍ថា ត្រូវបានជំរុញដោយក្ដីបារម្ភ ដែលថា គោលការណ៍ «មិនយកចូល» នូវអាវុធនុយក្លេអ៊ែរ អាចប៉ះពាល់ប្រសិទ្ធភាពនៃការការពារនុយក្លេអ៊ែររបស់សហរដ្ឋអាមេរិក។

ប្រសិនបើត្រូវបានអនុម័តមែននោះ ការកែប្រែនេះនឹងបង្ហាញពីការផ្លាស់ប្តូរដ៏សំខាន់ នៅក្នុងគោលលទ្ធិសន្តិសុខក្រោយសង្គ្រាមរបស់ជប៉ុន។ សារព័ត៌មាន Kyodo បានកត់សម្គាល់ថា ក្នុងនាមជាជនរងគ្រោះ ក្នុងសម័យសង្គ្រាមតែមួយគត់របស់ពិភពលោកនៃការទម្លាក់គ្រាប់បែកបរមាណូ ប្រទេសជប៉ុនបានគាំទ្រជាយូរមកហើយ ចំពោះពិភពលោកគ្មានអាវុធនុយក្លេអ៊ែរ ហើយការដកណាមួយពីជំហរនេះ អាចបង្កឲ្យមានប្រតិកម្មខ្លាំងៗ ទាំងក្នុងស្រុក និងអន្តរជាតិ។

គោលការណ៍មិនមានអាវុធនុយក្លេអ៊ែរ ៣ចំណុចរបស់ជប៉ុន ចែងថា ជប៉ុនមិនមានជាកម្មសិទ្ធ ឬផលិត និងមិនអនុញ្ញាតឲ្យយកចូលក្នុងទឹកដីជប៉ុននូវអាវុធនុយក្លេអ៊ែរឡើយ។ គោលការណ៍ត្រូវបានគេចាត់ទុកជាយូរមកហើយថា ជាមូលដ្ឋានគ្រឹះដ៏សំខាន់នៃគោលនយោបាយនុយក្លេអ៊ែររបស់ជប៉ុន៕