ប្រភពព័ត៌មានពីនគរបាល បានឲ្យដឹងថា មនុស្សយ៉ាងហោច ៩នាក់ ត្រូវបានសម្លាប់ និងមនុស្ស ២៩នាក់ផ្សេងទៀត បានរងរបួស ពេលដែលគំនរគ្រឿងផ្ទុះរឹបអូសបាន បានផ្ទុះឡើងនៅស្ថានីយនគរបាល ស្ថិតក្នុងតំបន់កាស្មៀ ប្រទេសឥណ្ឌា កាលពីយប់ថ្ងៃសុក្រ ។

ប្រភពបន្តថា ភាគច្រើននៃអ្នកស្លាប់ គឺជានគរបាល រួមទាំងមន្រ្តីកោសល្យវិច្ច័យដែលកំពុងពិនិត្យគ្រឿងផ្ទុះ ហើយភាគច្រើននៃអ្នករងរបួស ស្ថិតក្នុងស្ថានភាពធ្ងន់ធ្ងរ ។

ស្នងការនគរបាលដែនដីចាមមូ និងកាស្មៀ នឹងថ្លែងសុន្ទរកថានៅក្នុងសន្និសីទសារព័ត៌មាន ស្តីពីឧប្ទេវហេតុផ្ទុះគ្រាប់នេះ ។

មុននេះ មន្រ្តីនគរបាលក្នុងស្រុកមួយរូប និយាយប្រាប់ទីភ្នាក់ងារព័ត៌មានរ៉យទ័រថា ការផ្ទុះបានកើតមាននៅស្ថានីយនគរបាល Nowgam ។ អគ្គិភ័យបានហ៊ុមព័ទ្ធបរិវេនស្ថានីយ ហើយក្រុមភ្នាក់ងារពន្លត់អគ្គិភ័យបានរួសរាន់ទៅកាន់កន្លែងកើតហេតុ ។

ការផ្ទុះនេះដែរ បានកើតមានរយៈពេលប៉ុន្មានថ្ងៃប៉ុណ្ណោះ ក្រោយការផ្ទុះរថយន្តស្លាប់មនុស្សនៅរដ្ឋធានីញូវដែល្លី ដែលបានសម្លាប់មនុស្សយ៉ាងហោច ៨នាក់ នៅក្នុងឧបទ្ទេវហេតុមួយដែលរដ្ឋាភិបាលឥណ្ឌាចាត់ទុកថាជាអំពើភេរវកម្ម ។

សូមបញ្ជាក់ថា ប្រទេសប្រដាប់អាវុធនុយក្លេអ៊ែរឥណ្ឌា និងប្រទេសជិតខាងប៉ាគីស្ថាន បានជាប់ផុងក្នុងសង្រ្គាមម្តងម្កាលអស់រយៈពេលច្រើនទសវត្សរ៍មកហើយ ជុំវិញតំបន់ជម្លោះកាស្មៀ ៕