បាតុកម្មទ្រង់ទ្រាយធំប្រឆាំងនឹងបញ្ហាអសន្តិសុខ និងអំពើពុករលួយរបស់រដ្ឋាភិបាល បានប្រែក្លាយជាអំពើហិង្សានៅទីក្រុង Mexico City ប្រទេសម៉ិកស៊ិកកាលពីថ្ងៃសៅរ៍ម្សិលមិញ ពេលដែលក្រុមបាតុករប៉ះទង្គិចគ្នាជាមួយនគរបាលបង្រ្កាបកុបកម្មនៅក្រៅវិមានជាតិ ។

 ក្រុមបាតុកររាប់ពាន់នាក់ នាំគ្នាដង្ហែរក្បួនចេញពីវិមានឯករាជ្យ Angel ធ្វើដំណើរឆ្លងកាត់ដងផ្លូវ និងរុក្ខវិថីជាច្រើនខ្សែ មុនពេលទៅដល់ទីលានចតុរង្គ Zocalo ជាទីដែលវិមានជាតិស្ថិតនៅ និងជាទីដែលការិយាល័យរបស់លោកស្រីប្រធានាធិបតី Claudia Sheinbaum ស្ថិតនៅផងដែរ ។

 ភាពតានតឹងបានផ្ទុះឡើង ពេលដែលក្រុមបាតុកររុំមុខ ទាញផ្តួលរណាំងដែកការពារវិមាន បង្ខំឲ្យនគរបាលបង្រ្កាបកុបកម្មឆ្លើយតបវិញជាមួយនឹងការបាញ់ឧស្ម័នបង្ហូរទឹកភ្នែក និងគ្រាប់បែកផ្សែង ។

 ក្រុមបាតុករនាំគ្នារុញ និងទាត់របងដែក ខណៈពួកគេមួយចំនួនទៀត នាំគ្នាចោលដុំថ្មលើក្រុមមន្រ្តីនគរបាល ។

 បាតុកម្មដែលច្រើនតែរៀបចំឡើងដោយក្រុមយុវជនជំនាន់ Z នេះ បានទាក់ទាញពលរដ្ឋឲ្យមកចូលរួមតវ៉ាយ៉ាងច្រើនកុះករ ដើម្បីប្រឆាំងករណីអំពើហិង្សា រួមទាំងការធ្វើឃាតអភិបាលក្រុង Uruapan លោក Carlos Manzo ។

 ក្រុមបាតុករនាំគ្នា គ្រវីទង់ជាតិម៉ិកស៊ិក បង្ហាញការខកចិត្តរបស់ពួកគេចំពោះស្ថានភាពសន្តិសុខកាន់តែអាក្រក់ទៅ និងអំពើពុករលួយរបស់រដ្ឋាភិបាល ៕