ជំនន់ទឹកភ្លៀង បានជន់លិចជម្រកសំពត់តង់បណ្តោះអាសន្នគ្រួសារជម្លៀសខ្លួននៅទីក្រុងហ្កាហ្សា ធ្វើឲ្យស្ថានភាពរស់នៅរបស់ពួកគេកាន់តែអាក្រក់ទៅ និងធ្វើឲ្យកន្លែងសម្រាក និងទ្រព្យសម្បត្តិរបស់ពួកគេ សើមជោក ។

នៅទីស្នាក់ការកណ្តាលអង្គការសហប្រជាជាតិ(UN) ស្ថិតក្នុងបុរីញូវយ៉ក សហរដ្ឋអាមេរិក អ្នកនាំពាក្យ UN លោក Stephane Dujarric និយាយថា ជម្រកសំពត់តង់រាប់ពាន់កន្លែងត្រូវបានជន់លិច ដោយសារភ្លៀងធ្លាក់ខ្លាំង ដែលបង្កផលប៉ះពាល់កាន់តែខ្លាំងដល់មនុស្សនៅទូទាំងតំបន់ហ្កាហ្សា ហើយលោកបានធ្វើការព្រមានថា ពួកយើងមានការព្រួយបារម្ភថា ពលរដ្ឋជម្លៀសខ្លួនរាប់ពាន់គ្រួសារ នឹងរងផលប៉ះពាល់ដោយសារស្ថានភាពអាកាសធាតុអាក្រក់នេះ ។

លោកបន្តថា ក្រុមដៃគូ បាននឹងកំពុងធ្វើការ ដើម្បីផ្តល់ការគាំទ្រផ្នែកទីជម្រក និងបានបញ្ជូនក្រុមឆ្លើយតបរហ័ស ជួយអ្នកដែលរងផលប៉ះពាល់ដោយសារភ្លៀងធ្លាក់ខ្លាំង ។

លោក Abu Ahmed al Mtawaq គឺជាពលរដ្ឋហ្កាហ្សាជម្លៀសខ្លួនមួយរូបមកពីទីក្រុង Jabalia និយាយថា ពួកយើងលិចលង់ដោយសារតែភ្លៀងធ្លាក់ខ្លាំង ។ នេះជាទឹកភ្លៀងត្រឹមរយៈពេលកន្លះម៉ោងប៉ុណ្ណោះ ។

ចំណែកឯអ្នកស្រី Mariam al Najjar ដែលជាពលរដ្ឋហ្កាហ្សាជម្លៀសខ្លួនមួយរូបទៀតមកពីទីក្រុង Jabalia ដែរនោះ និយាយថា គ្រែដេករបស់ពួកយើងសើមជោកអស់ហើយ សម្លៀកបំពាក់របស់ពួកយើងក៏សើមជោកដូចគ្នា អ្វីៗដែលពួកយើងមាន សើមជោកអស់ហើយ ។

យោងតាមការអះអាងរបស់ក្រុមអាជ្ញាធរសុខភាពហ្កាហ្សា បានឲ្យដឹងថា តំបន់ជាច្រើននៅហ្កាហ្សា បានក្លាយជាគំនរបាក់បែក ដោយសារការទម្លាក់គ្រាប់បែករបស់អ៊ីស្រាអែលក្នុងរយៈពេលជាង ២ឆ្នាំកន្លងមកនេះ ដោយបានសម្លាប់មនុស្សប្រហែល ៦៨.០០០នាក់ ៕