ក្រុមអ្នកតវ៉ាអាកាសធាតុរាប់ពាន់នាក់ បាននាំគ្នាដើរដង្ហែឆ្លងកាត់ទីក្រុង Belem របស់ប្រទេសប្រេស៊ីល កាលពីថ្ងៃសៅរ៍ (១៥ វិច្ឆិកា) ដើម្បីបង្ហាញក្ដីកង្វល់របស់ពួកគេប្រកបដោយសន្តិវិធី ក្នុងការទាមទារឱ្យមានសកម្មភាពបន្ថែមទៀតដើម្បីការពារជោគវាសនានៃភពផែនដី និងដើម្បីបញ្ចេញកំហឹងរបស់ពួកគេចំពោះរដ្ឋាភិបាល និងឧស្សាហកម្មឥន្ធនៈហ្វូស៊ីល។

មិនឆ្ងាយប៉ុន្មានពីទីតាំងតវ៉ា ក្រុមអ្នកចរចាបានឈានដល់ពាក់កណ្តាលផ្លូវហើយ ក្នុងកិច្ចប្រជុំកំពូលអាកាសធាតុ COP30 ជាបន្តបន្ទាប់ ដែលព្យាយាមបង្វែរការសន្យាជាច្រើនឆ្នាំឱ្យទៅជាសកម្មភាពជាក់ស្ដែង ដើម្បីបញ្ឈប់ការកើនឡើងសីតុណ្ហភាពពិភពលោក និងផ្តល់ការគាំទ្រដល់អ្នករងផលប៉ះពាល់ខ្លាំងបំផុតដោយភពផែនដីដ៏ក្តៅគគុក។

នៅតាមដងផ្លូវ ហ្វូងជនជាតិដើមភាគតិច សកម្មជនវ័យក្មេង និងក្រុមសង្គមស៊ីវិល បានជួបជុំគ្នា ដោយច្រៀង លេងឧបករណ៍តន្រ្តី និងគ្រវីបដាតវ៉ា នៅពេលថ្ងៃត្រង់ ក្រោមសីតុណ្ហភាពជិត ៣០អង្សាសេ យ៉ាងក្ដៅគគុក។ ទិន្នន័យពីវិទ្យាស្ថានជាតិឧតុនិយមរបស់ប្រេស៊ីល បានឱ្យដឹងថា សំណើមខ្ពស់នៃទីក្រុងត្រូពិកមួយនេះ បានធ្វើឱ្យមនុស្សទទួលបានអារម្មណ៍នៃកម្ដៅខិតទៅជិត ៣៥អង្សាសេ។

លោកស្រី Marina Silva រដ្ឋមន្ត្រីក្រសួងបរិស្ថានរបស់ប្រេស៊ីល បាននិយាយទៅកាន់ហ្វូងអុ្នកតវ៉ាថា "នេះគឺជាទីកន្លែងសម្រាប់ការដើរដង្ហែ និងគូសផែនទីបង្ហាញផ្លូវ សម្រាប់អ្វីដែលត្រូវតែធ្វើឡើងនៅជំនួប COP ៖ នោះគឺ ការផ្លាស់ប្តូរចេញឆ្ងាយពីការកាប់បំផ្លាញព្រៃឈើ និងការប្រើប្រាស់ឥន្ធនៈហ្វូស៊ីល"៕