ទីភ្នាក់ងារគ្រប់គ្រងគ្រោះមហន្តរាយរបស់ឥណ្ឌូនេស៊ី បាននិយាយកាលពីថ្ងៃសៅរ៍ (១៥ វិច្ឆិកា) ថា គ្រោះបំណាក់ដីដ៏ធំក្រោយមានភ្លៀងធ្លាក់ខ្លាំងក្លានៅកោះជ្វាកណ្តាល បានសម្លាប់មនុស្ស ១១នាក់ហើយ ខណៈក្រុមជួយសង្គ្រោះកំពុងបន្តកិច្ចប្រឹងប្រែងដើម្បីស្វែងរកមនុស្ស ១២នាក់ផ្សេងទៀត ដែលបាត់ខ្លួន។

គ្រោះមហន្តរាយធម្មជាតិមួយនេះកើតឡើងក្នុងទីក្រុង Cilacap កាលពីថ្ងៃព្រហស្បតិ៍កន្លងទៅ ដោយគ្របសង្កត់ផ្ទះសម្បែងរាប់សិបខ្នងនៅក្នុងភូមិ Cibeunying ហើយប្រតិបត្តិការជួយសង្គ្រោះកំពុងមានការលំបាកខ្លាំង ដោយសារជនរងគ្រោះត្រូវបានកប់ក្នុងល្បប់ភក់ ជម្រៅពី ៣ ទៅ ៨ ម៉ែត្រ។

អ្នកនាំពាក្យរបស់ទីភ្នាក់ងារគ្រប់គ្រងគ្រោះមហន្តរាយ លោក Abdul Muhari បានប្រាប់សារព័ត៌មានរ៉យទ័រថា «មនុស្ស ១១នាក់ ត្រូវរកឃើញថាបានស្លាប់ គិតត្រឹមថ្ងៃសៅរ៍ ទី១៥ វិច្ឆិកា ហើយមនុស្ស ១២នាក់ទៀត នៅតែបន្តបាត់ខ្លួន»។

ទីភ្នាក់ងារអាកាសធាតុឥណ្ឌូនេស៊ី បាននិយាយថា រដូវវស្សារបស់ប្រទេសអាស៊ីអាគ្នេយ៍មួយនេះ បានចាប់ផ្តើមក្នុងខែកញ្ញា ហើយនឹងមានរយៈពេលរហូតដល់ខែមេសា ឆ្នាំក្រោយ ដែលនាំមកនូវហានិភ័យខ្ពស់នៃទឹកជំនន់ និងភ្លៀងធ្លាក់ខ្លាំង។ បំណាក់ដីដ៏ធំពុំមែនជាលើកទីមួយទេសម្រាប់ឥណ្ឌូនេស៊ី ដោយគ្រោះថ្នាក់មួយកាលពីខែមករា ដែលបង្កឡើងដោយភ្លៀងធ្លាក់ខ្លាំងបែបនេះនៅទីក្រុង Pekalongan នៅកោះជ្វាកណ្តាល បានសម្លាប់មនុស្សយ៉ាងតិច ២៥នាក់៕