ប្រធានាធិបតីហ្វាំងឡង់ លោក Alexander Stubb បានប្រាប់សារព័ត៌មាន AP កាលពីថ្ងៃសៅរ៍ (១៥ វិច្ឆិកា) ថា បទឈប់បាញ់នៅអ៊ុយក្រែន ទំនងជាមិនអាចកើតឡើងមុននិទាឃរដូវខាងមុខនេះទេ ហើយសម្ព័ន្ធមិត្តអឺរ៉ុប ត្រូវបន្តគាំទ្រអ៊ុយក្រែន ទោះជារឿងអាស្រូវពុករលួយកំពុងលេបត្របាក់ទីក្រុងគីវក៏ដោយ។

និទាឃរដូវនៅអឺរ៉ុប មានរយៈពេលជាផ្លូវការពីចុងខែមីនា ដល់ចុងខែមិថុនា គិតតាមតារាសាស្ត្រ ប៉ុន្តែតាមឧតុនិយម រដូវនេះត្រូវចាត់ទុកថាចាប់ផ្ដើមពីថ្ងៃទី១ ខែមីនា ដល់ថ្ងៃទី៣១ ខែឧសភា រៀងរាល់ឆ្នាំ។

ដោយលើកឡើងពីហានិភ័យខ្លាំងនាពេលបច្ចុប្បន្ន លោក Stubb បន្តថា ទន្ទឹមនឹងនោះ អឺរ៉ុបក៏នឹងត្រូវតែស៊ូទ្រាំ និងបង្កើតភាពធន់ ដើម្បីហែលឆ្លងរដូវរងាឆ្នាំ២០២៥នេះ ខណៈរុស្ស៊ី បន្តការវាយប្រហារកូនកាត់ និងសង្រ្គាមព័ត៌មានទូទាំងទ្វីបអឺរ៉ុប។ 

គួរឱ្យដឹងថា ហ្វាំងឡង់ជាប្រទេសដ៏តូចមួយនៅអឺរ៉ុប ប៉ុន្តែមានព្រំដែនដល់ទៅ ១.៣៤០គីឡូម៉ែត្រ ជាមួយរុស្ស៊ី។ នៅទសវត្សរ៍ឆ្នាំ១៩៤០ — បន្ទាប់ពីសង្រ្គាមពីរលើកជាមួយរុស្ស៊ី — ហ្វាំងឡង់បាត់បង់ទឹកដីប្រហែល ១០% ទៅក្នុងដៃក្រុងមូស្គូ ហើយបានយល់ព្រមធ្វើអព្យាក្រឹតយោធា ដែលជាជំហរមួយបានផ្លាស់ប្តូរ បន្ទាប់ពីប្រតិបត្តិការយោធារបស់រុស្ស៊ី លើអ៊ុយក្រែន កាលឆ្នាំ២០២២ នៅពេលដែលហ្វាំងឡង់ បានចូលរួមជាមួយសម្ព័ន្ធយោធាណាតូ។

ទាក់ទងនឹងជម្លោះអ៊ុយក្រែន លោក Stubb និយាយថា សំណួរធំៗចំនួន៣ កំពុងនៅលើផ្លូវឆ្ពោះទៅរកបទឈប់បាញ់ នោះគឺការធានាសន្តិសុខសម្រាប់អ៊ុយក្រែន ការកសាងសេដ្ឋកិច្ចឡើងវិញ និងការយល់ដឹងមួយចំនួនពីការទាមទារទឹកដី។ មេដឹកនាំហ្វាំងឡង់រូបនេះសង្កត់ធ្ងន់ថា ដើម្បីនាំមកនូវសន្តិភាពដល់អ៊ុយក្រែន លោកប្រធានាធិបតីអាមេរិក Donald Trump និងមេដឹកនាំអឺរ៉ុប ចាំបាច់ត្រូវបង្កើនសម្ពាធលើរុស្ស៊ី និងលើលោកប្រធានាធិបតីរុស្ស៊ី Vladimir Putin ឱ្យផ្លាស់ប្តូរការគិតយុទ្ធសាស្ត្ររបស់ខ្លួន៕