ពលរដ្ឋប៉ាឡេស្ទីន ដោយមានជំនួយពីអង្គការក្នុងស្រុកនានា និងទីភ្នាក់ងារអង្គការសហប្រជាជាតិ បានចាប់ផ្តើមយុទ្ធនាការមួយនៅទីក្រុងហ្កាហ្សាក្នុងគោលបំណងកសាងឡើងវិញនូវតំបន់ហ៊ុមព័ទ្ធដែលត្រូវបានពង្រាបភាគច្រើនទៅជាគំនរបាក់បែកដោយសារតែសង្គ្រាមរយៈពេលពីរឆ្នាំ។

លោក Amjad Al-Shawa នាយកបណ្តាញប៉ាឡេស្ទីនបាននិយាយថា «នេះគឺជាសញ្ញានៃក្តីសង្ឃឹមក្នុងការចាប់ផ្តើមស្វែងរកដំណោះស្រាយសម្រាប់កម្ទេចថ្មចំនួន៦០លានតោនដែលបន្សល់ទុកពីលំនៅឋាន អគារ និងហេដ្ឋារចនាសម្ព័ន្ធរបស់យើងដែលត្រូវបានបំផ្លាញ»។

អ្នកចូលរួមរាប់សិបនាក់ រួមមានមន្ត្រីអង្គការសហប្រជាជាតិ អ្នកស្ម័គ្រចិត្ត និងអ្នកស្រុកហ្កាហ្សា បានចូលរួមក្នុងពិធីនេះនៅកណ្តាលទីក្រុង ហើយបានចូលរួមក្នុងសកម្មភាពសម្អាតដោយប្រើប្រាស់ប៉ែលដើម្បីយកចេញកម្ទេចកម្ទី។ អង្គការសហប្រជាជាតិបាននិយាយថា យុទ្ធនាការនេះរួមមានការដាក់ពង្រាយគ្រឿងចក្រ និងរថយន្តដឹក ដើម្បីដឹកកម្ទេចថ្មចេញពីផ្លូវ។

កិច្ចព្រមព្រៀងបទឈប់បាញ់ដែលគាំទ្រដោយសហរដ្ឋអាមេរិករវាងអ៊ីស្រាអែលនិងក្រុមហាម៉ាស បានចូលជាធរមានកាលពីថ្ងៃទី១០ ខែតុលា ដោយបញ្ឈប់សង្គ្រាមរយៈពេលពីរឆ្នាំបង្កឡើងដោយការវាយប្រហារដ៏បង្ហូរឈាមដឹកនាំដោយក្រុមហាម៉ាសទៅលើអ៊ីស្រាអែលនៅថ្ងៃទី៧ ខែតុលា ឆ្នាំ២០២៣។

នៅក្រោមដំណាក់កាលដំបូងនៃផែនការដែលបានចូលជាធរមាននៅថ្ងៃទី១០ ខែតុលា យោធាអ៊ីស្រាអែលបច្ចុប្បន្នគ្រប់គ្រង៥៣% នៃដែនដីនៅមេឌីទែរ៉ាណេមួយនេះ រួមមានផ្នែកភាគច្រើននៃដីធ្វើកសិកម្ម រួមជាមួយទីក្រុងRafah នៅភាគខាងត្បូង ផ្នែកជាច្រើននៅទីក្រុងហ្កាហ្សា និងតំបន់ទីក្រុងផ្សេងទៀត។