ប្រធានាធិបតីហ្វាំងឡង់ លោក Alexander Stubb ជឿជាក់ថា បទឈប់បាញ់ក្នុងសង្គ្រាមរបស់រុស្ស៊ីប្រឆាំងនឹងអ៊ុយក្រែនទំនងជាមិនអាចសម្រេចបានមុនរដូវផ្ការីកទេ ហើយលោកនិយាយថា សម្ព័ន្ធមិត្តអឺរ៉ុបត្រូវតែបន្តគាំទ្រទីក្រុងគីវ ទោះបីជាមានរឿងអាស្រូវពុករលួយថ្មីៗនេះក៏ដោយ។ 

លោក Stubb បាននិយាយថា រូបលោកពុំមានសុទិដ្ឋិនិយមខ្លាំងពេកទេ អំពីការសម្រេចបានបទឈប់បាញ់ ឬការចាប់ផ្តើមចរចាសន្តិភាព យ៉ាងហោចណាស់នៅឆ្នាំនេះ។

លោកជឿជាក់ថា ដើម្បីនាំមកនូវសន្តិភាពដល់អ៊ុយក្រែន ប្រធានាធិបតីអាមេរិក លោក Donald Trump និងមេដឹកនាំអឺរ៉ុប ត្រូវតែដាក់សម្ពាធអតិបរមាលើរុស្ស៊ី និងលើមេដឹកនាំវិមានក្រឹមឡាំង លោក Vladimir Putin ដើម្បីបង្ខំឱ្យមានការផ្លាស់ប្តូរការគិតជាយុទ្ធសាស្ត្ររបស់រុស្ស៊ី។

លោកថា លោក Putin ជាទូទៅចង់បដិសេធឯករាជ្យភាព អធិបតេយ្យភាព និងបូរណភាពទឹកដីរបស់អ៊ុយក្រែន ហើយគោលបំណងទាំងនេះមិនបានផ្លាស់ប្តូរទេ ចាប់តាំងពីសង្គ្រាមបានចាប់ផ្តើមជិតបួនឆ្នាំមកនេះ។  

លោក Stubb បានគូសបញ្ជាក់ពីបញ្ហាសំខាន់ៗចំនួនបីនៅលើផ្លូវឆ្ពោះទៅរកបទឈប់បាញ់ គឺ ការធានាសន្តិសុខសម្រាប់អ៊ុយក្រែន ការកសាងសេដ្ឋកិច្ចរបស់អ៊ុយក្រែនឡើងវិញ និងសម្រេចបាន ការយល់ដឹងមួយចំនួន អំពីការអះអាងសិទ្ធិលើទឹកដី។  

លោក Sergey Kislitsa អនុរដ្ឋមន្ត្រីការបរទេសអ៊ុយក្រែន បានប្រាប់សារព័ត៌មាន The Times កាលពីថ្ងៃអង្គារសប្ដាហ៍មុនថា ទីក្រុងគីវ បានបោះបង់ចោល ការចរចាដោយផ្ទាល់ជាមួយទីក្រុងមូស្គូ បន្ទាប់ពីការចរចាបីជុំនៅទីក្រុងអ៊ីស្តង់ប៊ុល ដោយសារមើលឃើញមានវឌ្ឍនភាពតិចតួចពេក។ មិនមានកិច្ចប្រជុំ ណាមួយកើតឡើងឡើយ ចាប់តាំងពីចុងខែកក្កដា មក៕