​បាល់ទាត់៖ ក្រុមបាល់ទាត់​ជម្រើស​ជាតិ​អាយុ​ក្រោម ២៣​ឆ្នាំ​កម្ពុជា​នឹង​បន្ដ​ជួប​ក្រុម​ជម្រើស​ជាតិ​ U23 ​ហ្វីលីពីន​ដែល​ជា​ប្រកួត​ទី​២ ក្នុង​ពូ​ល​ A ​នៃ​ពានរង្វាន់​ AFF U23 Championship 2022 ​នា​វេលា​ម៉ោង ៧​យប់​ថ្ងៃ​ទី​១៧ ខែ​កុម្ភៈ​ស្អែក​នេះ​នៅ​ពហុ​កីឡដ្ឋាន​ជាតិ​មរតក​តេ​ជោ​។​

​ក្រោយ​យកឈ្នះ​ក្រុម​ប្រ៊ុយណេ ៦-០ មួយថ្ងៃ សហព័ន្ធ​កីឡាបាល់ទាត់​កម្ពុជាបាន​ដាក់លក់​សំបុត្រ​ចូល​ទស្សនាការ​ប្រកួត​ទី​២ របស់​ក្រុម​គោព្រៃ​ជំទង់​កម្ពុជាដែល​សំបុត្រ​មាន​លក់​នៅ ៦​ទីតាំង​ផ្សេងគ្នាដោយ​ចាប់ផ្ដើម​លក់កាលពី​ម្សិលមិញនៅ​ពហុ​កីឡដ្ឋាន​ជាតិ​អូឡាំពិក​, ហាង​កីឡា​ Fan Sport, ​ហាង​កីឡា​ Double H Sport, ​កីឡាករ​ Cambodia Airway ​និង​ Motor Café ​ទួលគោក។ រីឯ​ទីតាំង​មួយទៀតគឺ​នៅ​ពហុ​កីឡដ្ឋាន​ជាតិ​មរតក​តេ​ជោដែល​ត្រូវ​លក់​នៅ​ថ្ងៃ​ប្រកួត​ផ្ទាល់​តែម្ដង។​ ​លោក​ Ryu Hirose ​គ្រូបង្វឹក​ក្រុម​ U23 ​កម្ពុជា ជ័យជម្នះ​ក្នុងការ​ប្រកួត​ដំបូងនៃ​ព្រឹត្តិការណ៍​ប្រចាំ​តំបន់​នេះគឺជា​ការរៀបចំ​ក្រុម​យូរ​មកហើយ ប៉ុន្ដែ​ក៏មាន​រឿង​ជាច្រើនដែល​ត្រូវ​កែតម្រូវ​ផងដែរ ពិសេស​ការប្រកួត​បន្ទា​ប់​ជាមួយ​ហ្វីលីពីន ដោយ​លោក​រំពឹងថា កូនក្រុម​របស់ខ្លួន​នឹង​ធ្វើបាន​កាន់តែ​ល្អប្រសើរ​ថែមទៀត ដើម្បី​ឆ្លើយតប​នឹង​ការគាំទ្រ​ដ៏​ច្រើន​របស់​ទស្សនិកជន។​

​គួរ​ដឹងថា មុន​ឈានដល់​ការប្រកួត​រវាង​កម្ពុជា និង​ហ្វីលីពីនគឺ​ត្រូវ​ឆ្លងកាត់​ការប្រកួត ២​គូ​សិនរួមមាន​ក្រុម​ U23 ​ថៃត្រូវ​ជួប​ក្រុម​ U23 ​សិង្ហ​បុរីនា​វេលា​ម៉ោង ៧​យប់​នេះដែលជា​ជំនួប​បើកឆាក​ពូ​ល​ C ​នៅ​កីឡដ្ឋាន​ព្រី​នស៍ និង​ក្រុម​ U23 ​ប្រ៊ុយណេត្រូវ​ជួប​ U23 ​ទី​ម័​រ​ខាងកើតនា​វេលា​ម៉ោង ៤​ល្ងាច​ថ្ងៃទី​១៧ ខែកុម្ភៈ​ស្អែកនៅ​ពហុ​កីឡដ្ឋាន​ជាតិ​មរតក​តេ​ជោ។ ការប្រកួត​នេះនឹងមាន​ផ្សាយ​ផ្ទាល់​លើ​កញ្ចក់​ទូរទស្សន៍​ BTV-News៕

​អត្ថបទ៖ លី ឈុន​ឡា