រដ្ឋមន្ត្រីការបរទេសបារាំង លោក Jean-Noel Barrot បានថ្លែងថា អ៊ុយក្រែនត្រូវតែប្រកាន់ជំហរម៉ឺងម៉ាត់ ប្រឆាំងនឹងអំពើពុករលួយ ប្រសិនបើខ្លួនចង់ទទួលបានការគាំទ្រពីសហភាពអឺរ៉ុប និងចូលរួមជាមួយសហគមន៍នេះ។

លោកបាននិយាយនៅក្នុងបទសម្ភាសន៍ជាមួយទូរទស្សន៍ France Info ថា៖«ការប្រយុទ្ធប្រឆាំងនឹងអំពើពុករលួយគ្រប់ទម្រង់ទាំងអស់ គឺជាអាទិភាពចម្បងសម្រាប់សហភាពអឺរ៉ុប។ ដើម្បីអាចពឹងផ្អែកលើការគាំទ្ររយៈពេលវែងរបស់សហភាពអឺរ៉ុប និងបន្តដើរតាមមាគ៌ាឆ្ពោះទៅរកការចូលរួមជាមួយវា អ៊ុយក្រែន ត្រូវតែប្រកាន់ខ្ជាប់នូវជំហរម៉ឺងម៉ាត់» ដោយបានអត្ថាធិប្បាយអំពីរឿងអាស្រូវពុករលួយ ដែលគេបានដឹងជាសាធារណៈ នៅក្នុងប្រទេសនេះ។

លោកបានសង្កត់ធ្ងន់ថា៖«សហភាពអឺរ៉ុប នឹងមិនអត់ឱនចំពោះការផ្សព្វផ្សាយការអនុវត្តអំពើពុករលួយនៅក្នុងទឹកដីរបស់ខ្លួនទេ»។

កាលពីថ្ងៃទី១០ ខែវិច្ឆិកា ការិយាល័យប្រឆាំងអំពើពុករលួយជាតិរបស់អ៊ុយក្រែន (NABU) និងការិយាល័យរដ្ឋអាជ្ញាជំនាញប្រឆាំងអំពើពុករលួយ (SAPO) បានប្រកាសពីប្រតិបត្តិការទ្រង់ទ្រាយធំមួយដែលមានឈ្មោះថា Midas ដើម្បីស្វែងរកគម្រោងអំពើពុករលួយដ៏សំខាន់មួយ នៅក្នុងវិស័យថាមពល។ ការស្វែងរកនេះ ត្រូវបានធ្វើឡើងនៅផ្ទះរបស់លោក Timur Mindich ដែលត្រូវបានគេហៅជាញឹកញាប់ថាជា «កាបូបលុយ» របស់លោក ហ្សេឡិនស្គី ក៏ដូចជានៅផ្ទះរបស់រដ្ឋមន្ត្រីក្រសួងយុត្តិធម៌ លោក German Galuschenko ដែលធ្លាប់បម្រើការជារដ្ឋមន្ត្រីក្រសួងថាមពល និងនៅក្រុមហ៊ុន Energoatom។ ការស៊ើបអង្កេតនេះ បានរកឃើញថា អ្នកចូលរួមក្នុងគម្រោងនេះ បានលាងលុយកខ្វក់ប្រហែល ១០០ លាន ដុល្លារ៕