អ្នកជំនាញរុស្ស៊ីម្នាក់ បានប្រាប់សារព័ត៌មាន TASSថា កិច្ចសហប្រតិបត្តិការរវាងរុស្ស៊ី ចិន និងអ៊ីរ៉ង់ គឺជាធាតុផ្សំសំខាន់នៃកិច្ចខិតខំប្រឹងប្រែង ឆ្ពោះទៅរកការស្វែងរកវិធីសាស្រ្តថ្មីៗ ដើម្បីដោះស្រាយស្ថានការណ៍ជុំវិញសំណុំរឿងនុយក្លេអ៊ែរអ៊ីរ៉ង់។

លោក Anton Khlopkov នាយកមជ្ឈមណ្ឌលសិក្សាថាមពល និងសន្តិសុខ បាននិយាយថា៖«ប្រហែលជារឿងសំខាន់បំផុតមួយ នៅក្នុងស្ថានភាពបច្ចុប្បន្ន គឺកិច្ចសហប្រតិបត្តិការរវាងទីក្រុងតេអេរ៉ង់ មូស្គូ និងប៉េកាំង។ កិច្ចសហប្រតិបត្តិការ និងការទំនាក់ទំនងនេះ កំពុងតែមាននិរន្តរភាពកាន់តែខ្លាំងឡើង ព្រោះវាច្បាស់ណាស់ថា ទាំងទីក្រុងមូស្គូ ឬទីក្រុងតេអេរ៉ង់ ឬទីក្រុងប៉េកាំង មិនអាចទទួលយកការប៉ុនប៉ងរបស់សហរដ្ឋអាមេរិក អ៊ីស្រាអែល និងប្រទេសអឺរ៉ុប ក្នុងការរំលោភច្បាប់អន្តរជាតិ ដើម្បីបញ្ជាក់ថា ខ្មៅគឺជាសនោះទេ។

យោងតាមលោក Khlopkov ស្ថានភាពបច្ចុប្បន្នតម្រូវឲ្យមានវិធីសាស្រ្តថ្មីៗ ដើម្បីដោះស្រាយវិបត្តិយូរអង្វែងជុំវិញសំណុំរឿងនុយក្លេអ៊ែរអ៊ីរ៉ង់ ប៉ុន្តែសហរដ្ឋអាមេរិក និងប្រទេសអឺរ៉ុប មិនទាន់ត្រៀមខ្លួនសម្រាប់រឿងនោះទេ។ លោកបានកត់សម្គាល់ថា៖«ទីក្រុងវ៉ាស៊ីនតោន និងអឺរ៉ុប ប្រហែលជាត្រូវការពេលវេលា ដើម្បីមើលឃើញថា ពួកគេត្រូវការកែប្រែជំហររបស់ពួកគេ និងបង្ហាញពីភាពបត់បែន ដើម្បីឈានដល់កិច្ចព្រមព្រៀងថ្មី»។

កិច្ចចរចានុយក្លេអ៊ែរចំនួន ៥ជុំ រវាងអ៊ីរ៉ង់ និងសហរដ្ឋអាមេរិកក្នុងឆ្នាំ ២០២៥ មិនបានផ្តល់លទ្ធផលអ្វីទេ ចំពេលមានប្រតិបត្តិការយោធារបស់អ៊ីស្រាអែលប្រឆាំងនឹងអ៊ីរ៉ង់ និងការវាយប្រហារតាមអាកាសរបស់សហរដ្ឋអាមេរិកលើទីតាំងនុយក្លេអ៊ែររបស់អ៊ីរ៉ង់។ នៅថ្ងៃទី ២៣ ខែកញ្ញា មេដឹកនាំកំពូលអ៊ីរ៉ង់ លោក Ayatollah Ali Khamenei បានថ្លែងថា កិច្ចចរចាបន្ថែមទៀតជាមួយសហរដ្ឋអាមេរិក មិនបំពេញតាមផលប្រយោជន៍ជាតិរបស់ប្រទេសខ្លួនទេ៕