​បាល់ទាត់៖ ក្រុម​នាគ​ខៀវ​បឹងកេតបានបង្ហាញ​កីឡាករ​បរទេស​ទី​៥ របស់ខ្លួនសម្រាប់​ត្រៀម​រដូវ​កាល​ថ្មីនៃ​លី​គ​កំពូល​កម្ពុជាឆ្នាំ​២០២២ ហើយគឺ​ខ្សែបម្រើ​សញ្ជាតិ​ប្រេ​ស៊ី​ល​ Alexandre Cardoso Garcia។​ Alexandre Cardoso ​បាន​ផ្ទេរ​មក​បង្គ្រប់​កូតា​កីឡាករ​បរទេស​បឹងកេត សម្រាប់​ត្រៀម​រដូវ​កាល​ថ្មី បន្ទាប់ពី​អតីត​ក្រុម​ជើងឯក ៤​សម័យនេះបាន​នាំចូល​ខ្សែការពារ​អ៊ីរ៉ង់​ Taher Jahanbakhsh, ​ខ្សែបម្រើ​អា​ហ្វ​ហ្គា​នី​ស្ថាន​ Mastafa Zazai ​និង​ខ្សែប្រយុទ្ធ​នី​ហ្សេ​រី​យ៉ា​ Ajayi Opeyemi Korede ​បន្ថែម​លើ​សមាជិក​ចាស់ ១​រូបគឺ​ខ្សែប្រយុទ្ធ​សញ្ជាតិ​កា​មេ​រ៉ូ​ន​ Abbee Hurber។​

​មុន​ផ្ទេរ​មក​កម្ពុជាដើម្បី​ប្រឡូក​ក្របខណ្ឌ​ Cambodian Premier League ​កីឡាករ​វ័យ ២៩​ឆ្នាំ​រូបនេះធ្លាប់មាន​បទពិសោធន៍​ជោគជ័យនៅ​ប្រទេស​កំណើត និង​បណ្ដា​ប្រទេស​មួយចំនួន ដូចជា​ធ្លាប់​លេង​នៅ​លី​គ​ទី​៣ នៃ​ប្រទេស​ប្រេ​ស៊ី​ល​, លី​គ​ទី​២ នៃ​ប្រទេស​ព័រ​ទុយ​ហ្គា​ល់​, លី​គ​កំពូល​អូ​ម៉​ង់ និង​លី​គ​កំពូល​អា​រ៉ា​ប៊ី​សា​អូឌីត​ជាដើម ក្រោយ​ចាប់ផ្ដើម​អាជីព​បាល់ទាត់កាលពី​ឆ្នាំ​២០១០។​ ​វត្តមាន​ខ្សែបម្រើ​កម្ពស់ ១.៨២​ម៉ែត្រ​រូបនេះក៏​ធ្វើ​ឲ្យ​អនាគត​របស់​ខ្សែការពារ​ Anderson Zogbe ​ស្ថិតក្នុង​ភាពស្រពេចស្រពិល​ផងដែរ បន្ទាប់ពី​រូបគេ​បាន​រងរបួស​ដាច់​សរ​សៃ​ជង្គង់ និង​បានធ្វើ​ការវះកាត់កាលពី​រដូវ​កាល​មុន ដែល​មកទល់ពេលនេះមិនទាន់​ត្រឡប់​ចូល​ទីលាន​បាន​វិញ​នោះទេ។

តាមរយៈ​នេះគេ​មិនទាន់​ដឹងថា បឹងកេតត្រូវ​ចែកផ្លូវ​ជាមួយ​ខ្សែការពារ​សញ្ជាតិ​កូ​ឌឺ​វ័រ​រូបនេះ ឬ​យ៉ាងណា​នោះទេ ដ្បិត​កុងត្រា​របស់​ Anderson ​នៅសល់ ១រដូវ​កាល​ទៀត។​ ​គួរ​បញ្ជាក់ថា ទីផ្សារ​ដោះដូរ​កីឡាករនៃ​លី​គ​កំពូល​កម្ពុជាគ្រោង​នឹង​បិទ​បញ្ចប់​នា​ថ្ងៃទី​២៥ ខែកុម្ភៈ ឆ្នាំ​២០២២ ខាងមុខ ពោលគឺ​មុន​បើក​ការប្រកួត​រដូវ​កាល​ថ្មី ១០​ថ្ងៃ ខណៈ​បឹងកេតនឹងត្រូវ​បើកទ្វារ​កីឡដ្ឋាន​ Cambodia Airway ​ស្វាគមន៍​ក្រុម​ណាហ្គា​វើ​ល​ដ៏​មុនគេនា​ថ្ងៃទី​៥ ខែមីនា​ខាងមុខ៕

​អត្ថបទ៖ លី ឈុន​ឡា