ក្រុមប្រឹក្សាសន្តិសុខអង្គការសហប្រជាជាតិ (UNSC) នឹងបោះឆ្នោតនៅថ្ងៃចន្ទ (ទី១៧ ខែវិច្ឆិកា) នេះ ស្ដីពីសេចក្ដីសម្រេចព្រាងរបស់សហរដ្ឋអាមេរិក ដែលជំរុញដល់ផែនការសន្តិភាពតំបន់ហ្កាហ្សារបស់លោក Donald Trump ជាពិសេសការដាក់ពង្រាយកងកម្លាំងអន្តរជាតិ ខណៈដែលក្រុងវ៉ាស៊ីនតោនព្រមានថា ការខកខានមិនមានវិធានការ អាចនាំទៅរកការប្រយុទ្ធគ្នាជាថ្មី។

សេចក្តីព្រាងដែលត្រូវបានកែសម្រួលជាច្រើនដង ដោយសារការចរចាដ៏មានហានិភ័យខ្ពស់ «គាំទ្រ» ផែនការនេះ ដែលអនុញ្ញាតឲ្យមានបទឈប់បាញ់ដ៏ផុយស្រួយ រវាងអ៊ីស្រាអែល និងក្រុមហាម៉ាស ដែលបានចូលជាធរមានកាលពីថ្ងៃទី១០ ខែតុលា នៅក្នុងដែនដីប៉ាឡេស្ទីនដែលរងគ្រោះដោយសង្រ្គាម។ តំបន់ហ្កាហ្សាស្ទ្រីបត្រូវបានធ្វើឲ្យក្លាយទៅជាទីនៃគំនរថ្មបាក់បែកដោយភាគច្រើន បន្ទាប់ពីមានការប្រយុទ្ធគ្នាអស់រយៈពេល ២ឆ្នាំ។

កំណែចុងក្រោយបំផុតនៃឯកសារដែលត្រូវបានមើលឃើញដោយសារព័ត៌មាន អនុញ្ញាតឲ្យបង្កើតកងកម្លាំងស្ថិរភាពអន្តរជាតិ (ISF) ដែលនឹងធ្វើការជាមួយអ៊ីស្រាអែល និងអេហ្ស៊ីប និងនគរបាលប៉ាឡេស្ទីនដែលទើបត្រូវបានបណ្តុះបណ្តាលថ្មី ដើម្បីជួយធានាដល់តំបន់ព្រំដែន និងធ្វើឲ្យគ្មានយោធា នៅតំបន់ហ្កាហ្សាស្ទ្រីប។

ISF ក៏នឹងធ្វើការលើ «ការរំសាយអាវុធជាអចិន្ត្រៃយ៍ពីក្រុមប្រដាប់អាវុធមិនមែនរដ្ឋ» ការពារជនស៊ីវិល និងការធានាច្រករបៀងជំនួយមនុស្សធម៌។ លើសពីនេះ វានឹងអនុញ្ញាតឲ្យមានការបង្កើត «ក្រុមប្រឹក្សាសន្តិភាព» ដែលជាស្ថាប័នគ្រប់គ្រងអន្តរកាល សម្រាប់តំបន់ហ្កាហ្សា ដែលលោក Trump នឹងធ្វើជាប្រធាន ដោយមានអាណត្តិរហូតដល់ចុងឆ្នាំ២០២៧។ ហើយអ្វីដែលសំខាន់នោះ គឺថា មិនដូចសេចក្តីព្រាងមុនៗឡើយ កំណែចុងក្រោយបង្អស់ លើកឡើងអំពីការមានរដ្ឋប៉ាឡេស្ទីន នាពេលអនាគត៕