បាល់ទាត់៖ ពានរង្វាន់សម្ដេចតេជោ ហ៊ុន សែន លើកទី១៦ (ថ្នាក់ខេត្ត) ឆ្នាំ២០២២ បានឈានដល់ការប្រកួតជម្រុះតាមពូលសប្ដាហ៍ទី២ ហើយ ខណៈក្រុមភ្នំពេញហ្គាឡាក់ស៊ី និងខេត្តកំពង់ចាមបានត្រឹមចែកគ្នា ១ពិន្ទុម្នាក់ក្រោយប្រកួតស្មើគ្នា ១-១ នៅទីលានវិទ្យាល័យព្រះសីហនុកាលពីល្ងាចថ្ងៃទី១៥ ខែកុម្ភៈ ឆ្នាំ២០២២ ម្សិលមិញ។
ជំនួបសប្ដាហ៍ទី២ រវាងក្រុមទាំងពីរបានបំប៉ោងសំណាញ់ទីគ្នា ១គ្រាប់ម្នាក់តាំងពីវគ្គទី១ ខណៈវគ្គទី២ ក្រុមទាំងពីរបានព្យាយាមស្វែងរកគ្រាប់បាល់បន្ថែម តែធ្វើមិនបានសម្រេច។ ការចែកគ្នា ១ពិន្ទុម្នាក់នេះបានធ្វើឲ្យភ្នំពេញហ្គាឡាក់ស៊ីឈរកំពូលតារាងពូល B ជាបណ្ដោះអាសន្នដោយមាន ៤ពិន្ទុក្រោយឆ្លងកាត់ ២ប្រកួតឈ្នះ ១ និងស្មើ ១ ខណៈខេត្តកំពង់ចាមទើបរកបាន ១ពិន្ទុដំបូងប៉ុណ្ណោះ បន្ទាប់ពីប្រកួតបើកឆាកចាញ់ខេត្តកណ្ដាល ២-១។ ដោយឡែកលទ្ធផល ៣គូផ្សេងទៀត រួមមានខេត្តស្វាយរៀងបានទទួល ៣ពិន្ទុដំបូង ក្នុងពូល B ក្រោយយកឈ្នះខេត្តកណ្ដាលដោយលទ្ធផល ៣-១ នៅកីឡដ្ឋានខេត្តស្វាយរៀង។
ជ័យជម្នះនេះធ្វើឲ្យខេត្តស្វាយរៀងឈរលេខរៀងទី២ បណ្ដោះអាសន្នដោយមាន ៣ពិន្ទុស្មើគ្នាជាមួយខេត្តកណ្ដាលដែរ បន្ទាប់ពីឆ្លងកាត់ ២ប្រកួតឈ្នះ១ និងចាញ់ ១ ដូចគ្នា។ រីឯលទ្ធផលក្នុងពូល A ខេត្តកែបបានយកឈ្នះក្រុមម្ចាស់ផ្ទះខេត្តតាកែវ ២-១ នៅទីលានវិទ្យាល័យ សុខ អាន ព្រៃសណ្ដែក ស្របពេលខេត្តកំពង់ស្ពឺបានត្រឹមចែកគ្នា ១ពិន្ទុជាមួយខេត្តព្រះសីហនុក្រោយប្រកួតស្មើគ្នា១-១ នៅទីលានវិទ្យាល័យខេត្តកំពង់ស្ពឺ។ បច្ចុប្បន្នព្រះសីហនុកំពុងឈរកំពូលតារាងក្នុងពូលបណ្ដោះអាសន្នដោយមាន ៤ពិន្ទុតាមពីក្រោយខេត្តកែបដែលទើបរកបាន ៣ពិន្ទុពីការប្រកួតដំបូងរបស់ខ្លួន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
