អាជ្ញាធរ នៅថ្ងៃចន្ទ (ទី១៧ ខែវិច្ឆិកា) នេះ បានឲ្យដឹងថា បំណាក់ដែលបង្កឡើងដោយទឹកភ្លៀង នៅក្នុងតំបន់ចំនួន២ ក្នុងខេត្តជ្វាកណ្តាលរបស់ប្រទេសឥណ្ឌូនេស៊ី កាលពីសប្តាហ៍មុន បាននាំឲ្យមានការស្លាប់មនុស្សយ៉ាងហោចណាស់ ១៨នាក់ ខណៈប្រតិបត្តិការរុករកកំពុងបន្តមាន។

ទីភ្នាក់ងារកាត់បន្ថយគ្រោះមហន្តរាយ បានឲ្យដឹងថា បំណាក់ដីនៅក្នុងទីក្រុង Cilacap កាលពីសប្តាហ៍មុនបានកប់ផ្ទះសម្បែងរាប់សិបខ្នង នៅក្នុងភូមិ Cibeunying។ ស្ថាប័ននេះបានបញ្ជាក់បន្ថែមថា កិច្ចប្រឹងប្រែងស្វែងរក និងជួយសង្គ្រោះ កំពុងប្រឈមនឹងការលំបាក ខណៈដែលមនុស្សត្រូវបានកប់ក្នុងជម្រៅពី ៣ ទៅ ៨ម៉ែត្រ។

លោក M Abdullah ប្រធានផ្នែករុករក និងជួយសង្គ្រោះក្នុងតំបន់ បានប្រាប់ថា បំណាក់ដីនៅទីក្រុង Cilacap បានបណ្ដាលឲ្យមនុស្សយ៉ាងតិច ១៦នាក់ស្លាប់ និង ៧នាក់បាត់ខ្លួន។ រូបភាពវីដេអូពីប្រព័ន្ធផ្សព្វផ្សាយ KompasTV បានបង្ហាញឲ្យឃើញនៅថ្ងៃចន្ទនេះ នូវគ្រឿងចក្រអេស្កាវ៉ាទ័រ ដែលត្រូវបានដាក់ពង្រាយ ដើម្បីជីកកកាយដី នៅទីក្រុង Cilacap។

ទីភ្នាក់ងារកាត់បន្ថយគ្រោះមហន្តរាយ បានឲ្យដឹងនៅថ្ងៃចន្ទនេះថា ដោយឡែក មនុស្ស ២នាក់ បានបាត់បង់ជីវិត ហើយ ២៧នាក់កំពុងបាត់ខ្លួន បន្ទាប់ពីមានបំណាក់ដីកាលពីថ្ងៃសៅរ៍ចុងសប្ដាហ៍កន្លងមក នៅក្នុងតំបន់ Banjarnegara ក្នុងខេត្តជ្វាកណ្ដាល។ ទីភ្នាក់ងារបានបន្ថែមថា ផ្ទះសម្បែងរហូតដល់ទៅ ៣០ខ្នង ព្រមទាំងកសិដ្ឋានផងដែរ បានរងការខូចខាត៕