រដ្ឋបាលអាកាសចរណ៍សហព័ន្ធ (FAA) របស់សហរដ្ឋអាមេរិក បានប្រកាសកាលពីថ្ងៃអាទិត្យ (ទី១៦ ខែវិច្ឆិកា)ថា ខ្លួននឹងបញ្ចប់ការរឹតបន្តឹងជើងហោះហើរពាណិជ្ជកម្មទាំងអស់ដែលមានការកំណត់ប្រតិបត្តិការ នៅអាកាសយានដ្ឋានធំៗចំនួន ៤០ ក្នុងអំឡុងពេលមានការបន្លាយរយៈពេលបិទរដ្ឋាភិបាល។ បទបញ្ជាបន្ទាន់ដែលតម្រូវឲ្យកាត់បន្ថយជើងហោះហើរទូទាំងប្រទេស នឹងត្រូវដកចេញនៅវេលាម៉ោង ៦ព្រឹកថ្ងៃចន្ទ (ទី១៧ ខែវិច្ឆិកា) នេះ (ម៉ោងក្នុងស្រុក) ដោយអនុញ្ញាតឲ្យប្រព័ន្ធដែនអាកាសជាតិ ចាប់ផ្ដើមប្រតិបត្តិការស្តង់ដារឡើងវិញ បន្ទាប់ពីមានការរំខានជាច្រើនសប្តាហ៍។

រដ្ឋមន្ត្រីដឹកជញ្ជូន លោក Sean Duffy និងអ្នកគ្រប់គ្រង FAA លោក Bryan Bedford បាននិយាយថា ការសម្រេចនេះធ្វើឡើងតាមការណែនាំពីក្រុមសុវត្ថិភាពរបស់ទីភ្នាក់ងារ ដែលបានកត់សម្គាល់ពីការធ្លាក់ចុះជាបន្តបន្ទាប់នូវឧប្បត្តិហេតុ ទាក់ទងនឹងបុគ្គលិក នៅឯកន្លែងត្រួតពិនិត្យចរាចរណ៍ផ្លូវអាកាស។

លោក Duffy បានពោលសរសើរដល់ «ក្រុមសុវត្ថិភាពដែលមានភាពប្ដូរផ្ដាច់» របស់ FAA ដែលបន្តរក្សាសន្តិសុខ ក្នុងអំឡុងពេលបិទរដ្ឋាភិបាលរយៈពេលយូរ ដោយបញ្ជាក់ថា ដោយក្រុមអ្នកត្រួតពិនិត្យត្រឡប់ទៅធ្វើការវិញ ដូច្នេះ «ប្រតិបត្តិការធម្មតាអាចចាប់ផ្ដើមឡើងវិញហើយ»។ លោកបានគូសបញ្ជាក់អំពីអាទិភាព នាពេលអនាគត ក្នុងនោះរួមមានទាំងការពង្រឹងការជ្រើសរើសអ្នកត្រួតពិនិត្យ និងការអភិវឌ្ឍ «ប្រព័ន្ធគ្រប់គ្រងចរាចរណ៍ផ្លូវអាកាសដ៏ទំនើប» ផងដែរ។

FAA បានអនុវត្តដំបូងនូវបទបញ្ជាកាត់បន្ថយចរាចរណ៍ កាលពីថ្ងៃទី៧ ខែវិច្ឆិកា ខណៈដែលមានការខ្វះខាតបុគ្គលិកកាន់តែខ្លាំងឡើង អំឡុងពេលមានការជាប់គាំងថវិកា ដោយបង្កើតជាឧបសគ្គមិនធ្លាប់មានពីមុនមក ពាក់ព័ន្ធនឹងចរាចរណ៍ផ្លូវអាកាសជាតិ។ ការលុបចោលជើងហោះហើរបានឈានដល់កម្រិតខ្ពស់បំផុត កាលពីថ្ងៃទី៩ ខែវិច្ឆិកា នៅពេលដែលក្រុមហ៊ុនអាកាសចរណ៍ បានផ្អាកជើងហោះហើរជាង ២.៩០០ជើង ដោយសារអាណត្តិរបស់ FAA ការខ្វះខាតអ្នកគ្រប់គ្រងការបញ្ជា និងលក្ខខណ្ឌអាកាសធាតុមិនល្អ។

លក្ខខណ្ឌបានចាប់ផ្តើមប្រសើរឡើង កាលពីសប្តាហ៍មុន នៅពេលដែលបណ្ដាមេដឹកនាំសភា បានធ្វើការឆ្ពោះទៅរកការដោះស្រាយដំណើរការបិទរដ្ឋាភិបាល ដែលអនុញ្ញាតឲ្យ FAA លុបចោលផែនការ សម្រាប់ការកាត់បន្ថយជើងហោះហើរបន្ថែមទៀត៕