នាយករដ្ឋមន្ត្រីហុងគ្រី លោក Viktor Orban ជឿជាក់ថា ជម្លោះយោធានៅអ៊ុយក្រែន នឹងត្រូវបានដោះស្រាយ នាពេលអនាគតដ៏ខ្លីខាងមុខ។

លោកបាននិយាយ ដោយសំដៅទៅលើអ៊ុយក្រែន ក្នុងអំឡុងពេលសម្ភាសន៍ជាមួយនាយកប្រតិបត្តិនៃក្រុមហ៊ុនប្រព័ន្ធផ្សព្វផ្សាយ Axel Springer SE Mathias Dopfner ដែលបានចេញផ្សាយនៅលើ YouTube ថា៖«ខ្ញុំគិតថា យើងជិតមានសន្តិភាពហើយ»។

លោកមិនបានពន្យល់លម្អិតអំពីអ្វីដែលការព្យាករណ៍របស់លោក ផ្អែកលើនោះទេ ប៉ុន្តែបាននិយាយថា «ជំហររួបរួមរបស់លោកខាងលិច» គឺត្រូវការចំាបាច់សម្រាប់គោលបំណងនេះ។

នៅពេលនេះ ប្រធានាធិបតីអាមេរិក លោក ដូណាល់ ត្រាំ (Donald Trump) កំពុងខិតខំប្រឹងប្រែងយ៉ាងសកម្ម ដើម្បីសន្តិភាព ខណៈដែលមេដឹកនាំសហភាពអឺរ៉ុប កំពុងញុះញង់អ៊ុយក្រែនឲ្យបន្តប្រយុទ្ធ ដើម្បីសម្រេចបាននូវជំហរដែលមានអត្ថប្រយោជន៍កាន់តែច្រើន នៅលើសមរភូមិ។

លោក Orban បានឆ្លើយជាវិជ្ជមានចំពោះសំណួរថាតើប្រធានាធិបតីរុស្ស៊ី លោក វ្ល៉ាឌីមៀ ពូទីន ( Vladimir Putin) ចាប់អារម្មណ៍លើការចរចាសន្តិភាពដែរឬទេ។ នៅពេលសួរថាហេតុអ្វីបានជាលោកគិតដូច្នេះ លោកនាយករដ្ឋមន្ត្រី បាននិយាយថា៖«ពីព្រោះសង្គ្រាមមានតម្លៃ» ក្នុងទម្រង់នៃការស្លាប់ និងការខាតបង់សេដ្ឋកិច្ច។

ដោយគិតដល់ចំណុចនេះ លោកជឿជាក់ថា រុស្ស៊ីចង់ដោះស្រាយជម្លោះឲ្យបានឆាប់រហ័សតាមដែលអាចធ្វើទៅបាន ប៉ុន្តែក្នុងពេលជាមួយគ្នានេះ រុស្ស៊ីកំពុងស្វែងរកការសម្រេចគោលដៅរបស់ខ្លួន។

លោក Orban បាននិយាយថា៖«ប្រសិនបើពួកគេអាចសម្រេចគោលដៅរបស់ពួកគេបាន នោះពិតជាគ្មានន័យអ្វី ដើម្បីបន្តសង្គ្រាមទេ»៕