ជាកិច្ចប្រឹងប្រែងជំរុញការទូតដ៏សំខាន់ រដ្ឋាភិបាលថ្មីរបស់ស៊ីរី កំពុងចូលរួមក្នុងកិច្ចប្រជុំអន្តរជាតិកម្រិតខ្ពស់ជាបន្តបន្ទាប់ ក្នុងគោលបំណងបញ្ចប់ភាពឯកោផ្នែកនយោបាយរបស់ខ្លួន និងដោះស្រាយវិបត្តិផ្ទៃក្នុងដែលកំពុងបន្តមាន។ សកម្មភាពដ៏មមាញឹកនេះ បន្ទាប់ពីរបបរបស់លោក Bashar al-Assad បានដួលរលំ កាលពីខែធ្នូ ឆ្នាំ២០២៤ ដែលអាចជាចំណុចរបត់មួយ សម្រាប់ប្រទេសដែលត្រូវបានហែកហួរដោយសង្រ្គាម បន្ទាប់ពីមានជម្លោះជិត ១៤ឆ្នាំ។

ហើយអ្វីដែលសំខាន់នោះ គឺថា ការវិវត្តដ៏គួរឲ្យកត់សម្គាល់បំផុត គឺការមាននូវទំនាក់ទំនងដ៏គួរឲ្យកក់ក្ដីជាមួយសហរដ្ឋអាមេរិក។ បន្ទាប់ពីមានដំណើរទស្សនកិច្ចរបស់ប្រធានាធិបតីស៊ីរី លោក Ahmed al-Sharaa នៅក្រុងវ៉ាស៊ីនតោន សេចក្ដីរាយការណ៍នានា បានឲ្យដឹងថា ប្រធានាធិបតីអាមេរិក លោក Donald Trump ឥឡូវនេះ កំពុងរៀបចំផែនការធ្វើដំណើរទៅកាន់ទីក្រុងដាម៉ាសវិញម្ដង។ យោងតាមទូរទស្សន៍ Al-Arabiya/Al-Hadath TV ដែលមានមូលដ្ឋាននៅទីក្រុងឡុងដ្រ៍ បានឲ្យដឹងថា លោក Trump បាននិយាយថា៖ «នឹងមានកិច្ចព្រមព្រៀងមួយក្នុងពេលឆាប់ៗនេះ ហើយខ្ញុំចង់ប្រកាសបីវា នៅទីក្រុងដាម៉ាស»។

ដំណើរទស្សនកិច្ចនេះ កើតឡើងបន្ទាប់ពីមានការផ្អាកជាបណ្តោះអាសន្ននូវទណ្ឌកម្មអន្តរជាតិដោយសហរដ្ឋអាមេរិក និងចក្រភពអង់គ្លេស ដែលបានដាក់បីដំបូង សម្រាប់ឧក្រិដ្ឋកម្មសង្រ្គាម ដែលបានប្រព្រឹត្តដោយអតីតរបបនេះ។

ក្នុងពេលជាមួយគ្នានោះ រដ្ឋមន្ត្រីការបរទេសស៊ីរី លោក Es'ad Hasan al-Shaibani បានធ្វើដំណើរទៅកាន់ទីក្រុងប៉េកាំង ដើម្បីបំពេញទស្សនកិច្ចការទូតកម្រិតខ្ពស់លើកដំបូង ដែលធ្វើឡើងដោយប្រទេសស៊ីរីទៅកាន់ប្រទេសចិន ចាប់តាំងពីមានការផ្លាស់ប្តូររបប។ លើសពីមហាអំណាចធំៗ កិច្ចប្រឹងប្រែងស្ថិរភាពក្នុងតំបន់ ក៏កំពុងដំណើរការផងដែរ៕