ក្នុងអំឡុងពេលមានទស្សនកិច្ចរបស់លោប្រធានាធិបតី Volodymyr Zelenskiy នៅទីក្រុងអាតែន ប្រទេសអ៊ុយក្រែនបានទទួលបាននូវការធានាការនាំចូលឧស្ម័នធម្មជាតិរាវ (LNG) របស់សហរដ្ឋអាមេរិក ពីក្រិក ដើម្បីបំពេញតម្រូវការរដូវរងារបស់ខ្លួន ចាប់ពីខែធ្នូដល់ខែមីនាឆ្នាំក្រោយ។ នេះបើតាមការឲ្យដឹងពីសំណាក់មន្ត្រីក្រិក និងអ៊ុយក្រែន ដែលបាននិយាយកាលពីថ្ងៃអាទិត្យ (ទី១៦ ខែវិច្ឆិកា)។

អ៊ុយក្រែននឹងនាំចូលឧស្ម័នតាមរយៈបំពង់បង្ហូរដែលរត់កាត់ឧបទ្វីបបាល់កង់ ដើម្បីទទួលបានការផ្គត់ផ្គង់សំខាន់ៗ បន្ទាប់ពីមានការវាយប្រហាររបស់រុស្ស៊ីលើហេដ្ឋារចនាសម្ព័ន្ធថាមពល និងទីកន្លែងផលិតឧស្ម័ន។

ក្រុមហ៊ុនឧស្ម័នក្រិក DEPA និងក្រុមហ៊ុនរដ្ឋរបស់អ៊ុយក្រែន Naftogaz បានឲ្យដឹងនៅក្នុងសេចក្តីថ្លែងការណ៍រួមថា កិច្ចព្រមព្រៀងនេះមានប្រសិទ្ធភាពចាប់ពីខែធ្នូ។ លោក Zelenskiy អំឡុងពេលជជែកជាមួយនាយករដ្ឋមន្ត្រីក្រិក លោក Kyriakos Mitsotakis បាននិយាយថា ការផ្គត់ផ្គង់នឹងចាប់ផ្តើមនៅក្នុងខែមករា។

លោក Zelenskiy បានប្រាប់អ្នកសារព័ត៌មានថា៖ «យើងសាងសង់ឡើងវិញរាល់ពេលដែលរុស្ស៊ីបំផ្លាញ ប៉ុន្តែនេះពិតជាត្រូវការពេលវេលា ការប្រឹងប្រែងច្រើន ឧបករណ៍ និងទាក់ទងនឹងឧស្ម័ន ការនាំចូល គឺដើម្បីទូទាត់ ចំពោះការបផ្លិចបំផ្លាញដោយរុស្ស៊ីលើផលិតកម្មរបស់យើង»។

មុនពេលដំណើរទស្សនកិច្ចរបស់លោក នៅក្រិក លោក Zelenskiy បានប្រាប់ថា ទីក្រុងគីវបានលៃទុកមូលនិធិ សម្រាប់ការនាំចូលឧស្ម័នពីដៃគូអឺរ៉ុប និងធនាគារ ក្រោមការធានារបស់គណៈកម្មការអឺរ៉ុប ក៏ដូចជាពីធនាគារអ៊ុយក្រែន ដើម្បីជួយបំពេញតម្រូវការជិត ២ពាន់លានអឺរ៉ូ (២,៣ពាន់លានដុល្លារ)។ លោកបានបន្ថែមថា រដ្ឋាភិបាលអ៊ុយក្រែនក៏កំពុងធ្វើការជាមួយដៃគូរបស់សហរដ្ឋអាមេរិកផងដែរ ដើម្បីធានាបាននូវមូលនិធិទាំងស្រុង៕