នាយករដ្ឋមន្ត្រីប៉ូឡូញ លោក Donald Tusk បាននិយាយនៅថ្ងៃចន្ទ (ទី១៧ ខែវិច្ឆិកា) នេះថា ការផ្ទុះដែលបានបំផ្លិចបំផ្លាញផ្លូវរថភ្លើង រវាងទីក្រុង Warsaw និង Lublin កាលពីថ្ងៃទី១៦ ខែវិច្ឆិកា គឺបង្កឡើងដោយអំពើវិឆ្ឆេទកម្ម។

តាមរយៈការបង្ហោះលើបណ្ដាញសង្គម X លោក Tusk បានសរសេរថា៖ «ការផ្ទុះគ្រឿងផ្ទុះ បានបំផ្លិចបំផ្លាញផ្លូវរថភ្លើង»។ លោកបានរៀបរាប់បន្ថែមថា៖ «សេវាសង្គ្រោះបន្ទាន់ និងការិយាល័យរបស់រដ្ឋអាជ្ញា កំពុងធ្វើការនៅកន្លែងកើតហេតុ។ នៅលើផ្លូវដដែល កៀកនឹងទីក្រុង Lublin ការខូចខាតក៏ត្រូវបានប្រទះឃើញផងដែរ»។

គួរបញ្ជាក់ថា នគរបាលក្នុងតំបន់ បានឲ្យដឹងកាលពីថ្ងៃទី១៦ ខែវិច្ឆិកាថា អ្នកបើកបររថភ្លើងម្នាក់ បានរាយការណ៍ពីការខូចខាតនៅលើផ្លូវរថភ្លើង នៅភាគកណ្តាលនៃប្រទេសប៉ូឡូញ។

ទីក្រុងវ៉ាសូវី បានឲ្យដឹងកាលពីអទីតកាលថា តួនាទីរបស់ខ្លួន ក្នុងនាមជាមជ្ឈមណ្ឌលផ្ដល់ជំនួយដល់អ៊ុយក្រែន ក្នុងសង្គ្រាមរបស់រុស្ស៊ី ធ្វើឲ្យខ្លួនក្លាយជាគោលដៅ សម្រាប់អំពើវិឆ្ឆេទកម្ម។ ទីក្រុងមូស្គូបានបដិសេធម្តងហើយម្តងទៀតថា ខ្លួនមិនបានធ្វើនូវសកម្មភាពបែបនេះឡើយ៕