នគរបាលបានឲ្យដឹងថា ខ្មាន់កាំភ្លើងបានវាយប្រហារលើសាលាសិស្សស្រីគ្រប់គ្រងដោយរដ្ឋាភិបាល ក្នុងរដ្ឋ Kebbi របស់ប្រទេសនីហ្សេរីយ៉ា នាព្រឹកថ្ងៃចន្ទ (ទី១៧ ខែវិច្ឆិកា) នេះ ដោយបានសម្លាប់នាយករងសាលា និងចាប់ពង្រត់សិស្សស្រីចំនួន ២៥នាក់ ដោយនេះជាការចាប់ជំរិតដ៏ធំបំផុតចុងក្រោយបង្អស់ នៅភាគពាយព្យរបស់ប្រទេសនេះ។

អ្នកនាំពាក្យនគរបាល លោក Nafiu Abubakar Kotarkoshi បាននិយាយថា ជនដៃដល់ប្រដាប់ដោយកាំភ្លើងវែង បានសម្រុកចូលសាលាមធ្យមសិក្សាចំណេះទូទៅសម្រាប់សិស្សស្រីគ្រប់គ្រងដោយរដ្ឋាភិបាល ក្នុងទីក្រុង Maga នៅវេលាម៉ោងប្រហែល ៤ព្រឹក (ម៉ោងក្នុងស្រុក) ដោយមានការបាញ់ប្រហារជាមួយនគរបាល មុនពេលឡើងរបងសាលា ហើយចាប់ពង្រត់សិស្សស្រីៗ។

អ្នកនាំពាក្យរូបនេះបានបន្ថែមថា នាយករងសាលា លោក Hassan Yakubu Makuku ត្រូវបានបាញ់សម្លាប់ ពេលតតាំងនឹងក្រុមជនខិលខូចទាំងនោះ ហើយបុគ្គលិកម្នាក់ទៀតបានរងរបួសដោយគ្រាប់កាំភ្លើង។

នគរបាលបានឲ្យដឹងទៀតថា អង្គភាពយុទ្ធសាស្ត្រ ទាហាន និងអ្នកស្ម័គ្រចិត្ត ក្នុងតំបន់ ត្រូវបានដាក់ពង្រាយ ដើម្បីតាមរកជនសង្ស័យរត់គេចខ្លួន នៅតាមផ្លូវនានា និងតាមព្រៃ ក្នុងប្រតិបត្តិការស្វែងរក និងជួយសង្គ្រោះ។

គួរបញ្ជាក់ថា ភាគពាយព្យនៃប្រទេសនីហ្សេរីយ៉ា បានឃើញមានការចាប់ពង្រត់នៅតាមសាលារៀនម្តងហើយម្តងទៀត ដោយក្រុមប្រដាប់អាវុធដែលតម្រូវឲ្យយកប្រាក់ទៅលោះ ទោះបីជាមានការសន្យាពីរដ្ឋាភិបាល ក្នុងការពង្រឹងសន្តិសុខនៅក្នុងតំបន់ក៏ដោយ។ ក្រុមសកម្មប្រយុទ្ធអ៊ីស្លាម Boko Haram បានចាប់ពង្រត់សិស្សសាលាចំនួន ២៧០នាក់ ក្នុងឆ្នាំ២០១៤ នៅទីក្រុង Chibok ភាគឦសាន។ បើទោះបីជាក្មេងស្រីជាច្រើន បានរត់រួចខ្លួន ឬក្រោយមកត្រូវបានដោះលែងក៏ដោយ ក៏មួយចំនួនមិនបានត្រឡប់មកវិញឡើយ៕