ក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោតគាំទ្រសេចក្តីសម្រេចមួយព្រាងឡើងដោយសហរដ្ឋអាមេរិក ដែលគាំទ្រផែនការសន្តិភាព ២០ ចំណុចរបស់លោក Donald Trump សម្រាប់តំបន់ហ្កាហ្សា។

នៅក្នុងផែនការនេះដែរ គឺមានការបង្កើតកងកម្លាំងស្ថិរភាពអន្តរជាតិ (ISF) ដែលសហរដ្ឋអាមេរិកនិយាយថាប្រទេសជាច្រើន មិនបញ្ចេញឈ្មោះបានផ្តល់ជូនដើម្បីចូលរួមចំណែកលើផែនការរបស់ខ្លួន។

សេចក្តីសម្រេចនេះត្រូវបានគាំទ្រដោយប្រទេសចំនួន ១៣ រួមទាំងចក្រភពអង់គ្លេស បារាំង និងសូម៉ាលី - ដោយគ្មានការបោះឆ្នោតប្រឆាំងនឹងសំណើនេះទេ។ រុស្ស៊ី និងចិនបានអនុប្បវាទ។

ក្រុមហាម៉ាស បានបដិសេធសេចក្តីសម្រេចនេះ ដោយនិយាយថា សេចក្តីសម្រេចនេះ បរាជ័យក្នុងការបំពេញសិទ្ធិ និងការទាមទាររបស់ប្រជាជនប៉ាឡេស្ទីន។ 

ក្រុមនេះបាននិយាយនៅលើ Telegram ថា ផែនការនេះ ដាក់យន្តការអាណាព្យាបាលអន្តរជាតិលើតំបន់ហ្កាហ្សា ដែលប្រជាជនរបស់ខ្លួន និងក្រុមរបស់ពួកគេ បដិសេធ។

យោងតាមរបាយការណ៍ស្តីពីសេចក្តីព្រាងចុងក្រោយបំផុត ផ្នែកមួយនៃតួនាទីរបស់កងកម្លាំងស្ថិរភាពអន្តរជាតិ ISF គឺធ្វើការលើ ការរំសាយអាវុធជាអចិន្ត្រៃយ៍ពីក្រុមប្រដាប់អាវុធមិនមែនរដ្ឋ - រួមទាំងក្រុមហាម៉ាស - ក៏ដូចជាការការពារជនស៊ីវិល និងបើកផ្លូវជំនួយមនុស្សធម៌ ជាដើម ៕