អង្គការសហប្រជាជាតិបាននិយាយកាលពីថ្ងៃចន្ទ១៧វិច្ឆិកាថា ការកាត់ទោសអតីតនាយករដ្ឋមន្ត្រីបង់ក្លាដែស លោកស្រី Sheikh Hasina ពីបទឧក្រិដ្ឋកម្មប្រឆាំងនឹងមនុស្សជាតិ បានក្លាយជាពេលវេលាដ៏សំខាន់មួយសម្រាប់ជនរងគ្រោះ ប៉ុន្តែលោកស្រី មិនគួរត្រូវបានកាត់ទោសប្រហារជីវិតនោះទេ។

លោកស្រី Hasina វ័យ៧៨ ឆ្នាំ នៅតែសំងំលាក់ខ្លួនក្នុងប្រទេសឥណ្ឌា ក្នុងអំឡុងពេលសវនាការ ដោយចោទប្រកាន់ថា លោកស្រីបានបញ្ជាឱ្យបង្ក្រាបដ៏បង្ហូរឈាមប្រឆាំងនឹងការបះបោរដឹកនាំដោយក្រុមចលនានិស្សិតកាលពីឆ្នាំមុន ដែលនៅទីបំផុតបានបណ្តេញលោកស្រីចេញពីតំណែង។ 

ក្នុងការកាត់ក្ដីកំបាំងមុខ លោកស្រីត្រូវបានកាត់ទោសព្យួរក ចំពោះបទឧក្រិដ្ឋកម្មប្រឆាំងនឹងមនុស្សជាតិ ជុំវិញការបង្ក្រាបនេះ ដែលមនុស្សរហូតដល់១.៤០០នាក់ត្រូវបានសម្លាប់រវាងខែកក្កដា និងខែសីហា ឆ្នាំ២០២៤ នេះបើយោងតាមអង្គការសហប្រជាជាតិ។

ការិយាល័យសិទ្ធិមនុស្សរបស់អង្គការសហប្រជាជាតិ ដែលបានកំណត់នៅក្នុងរបាយការណ៍មួយកាលពីខែកុម្ភៈថា អតីតរដ្ឋាភិបាលបង់ក្លាដែសនៅពីក្រោយការវាយប្រហារជាប្រព័ន្ធ និងការសម្លាប់ក្រុមបាតុករ ដែលអាចចាត់ទុកថាជាឧក្រិដ្ឋកម្មប្រឆាំងនឹងមនុស្សជាតិ បានស្វាគមន៍ចំពោះសាលក្រមនោះ។

អ្នកនាំពាក្យការិយាល័យសិទ្ធិមនុស្សUN លោកស្រី Ravina Shamdasani បាននិយាយក្នុងសេចក្ដីថ្លែងការណ៍ថា ពួកលោកស្រីមានការសោកស្ដាយចំពោះទោសប្រហារជីវិតនេះ ដែល ពួកលោកស្រីប្រឆាំងគ្រប់កាលៈទេសៈទាំងអស់៕