នៅថ្ងៃអង្គារ (១៨ វិច្ឆិកា) នេះ ប្រទេសជប៉ុន បានចេញសេចក្ដីណែនាំដល់ពលរដ្ឋរបស់ខ្លួននៅក្នុងប្រទេសចិន ឱ្យបង្កើនការប្រុងប្រយ័ត្នសុវត្ថិភាព និងជៀសវាងទីកន្លែងដែលមានមនុស្សច្រើន ស្របពេលជម្លោះការទូតរវាងទីក្រុងប៉េកាំង និងទីក្រុងតូក្យូ កាន់តែស៊ីជម្រៅឡើង ជុំវិញបញ្ហាកោះតៃវ៉ាន់។

រដ្ឋមន្រ្តីទទួលបន្ទុកទីស្ដីការគណៈរដ្ឋមន្រ្តីជប៉ុន លោក Minoru Kihara បាននិយាយថា សេចក្ដីណែនាំចុងក្រោយបង្អស់គឺជាការអំពាវនាវជាថ្មីសម្រាប់វិធានការសុវត្ថិភាព ខណៈមនោសញ្ចេតនាចំពោះជប៉ុន ដែលត្រូវឆ្លុះបញ្ចាំងក្នុងប្រព័ន្ធផ្សព្វផ្សាយរបស់ចិន បានធ្លាក់ចុះ បន្ទាប់ពីព្រឹត្តិការណ៍ការទូតថ្មីៗនេះធ្វើឱ្យប៉ះពាល់ដល់ទំនាក់ទំនងរបស់ប្រទេសជិតខាងទាំងពីរ។

ជម្លោះការទូតរវាងមហាអំណាចអាស៊ីបូព៌ាទាំងពីរ កាន់តែតានតឹងឡើង ចាប់តាំងពីនាយករដ្ឋមន្ត្រីជប៉ុន លោកស្រី Sanae Takaichi ប្រាប់សភាកាលពីថ្ងៃទី៧ ខែវិច្ឆិកាថា ការវាយក្រសោបរបស់ចិន លើកោះស្វ័យគ្រប់គ្រងតៃវ៉ាន់ អាចបង្កឱ្យមានការឆ្លើយតបខាងយោធាពីទីក្រុងតូក្យូ។ ការលើកឡើងនេះបានជំរុញឱ្យមានការឆ្លើយតបយ៉ាងខឹងសម្បារពីទីក្រុងប៉េកាំង ដែលបានផ្ដល់សញ្ញាថា ខ្លួនរំពឹងថាលោកស្រី Takaichi នឹងដកសុន្ទរកថានេះចេញក្នុងទម្រង់មួយចំនួន។

លោក Kihara បាននិយាយអំពីសេចក្ដីជូនដំណឹងសុវត្ថិភាពនៅថ្ងៃអង្គារនេះថា "ជប៉ុនបានធ្វើការវិនិច្ឆ័យបែបនេះ ដោយផ្អែកលើការពិចារណាយ៉ាងទូលំទូលាយអំពីស្ថានភាពសន្តិសុខនៅក្នុងប្រទេស ឬតំបន់ ក៏ដូចជាស្ថានភាពនយោបាយ និងសង្គមរបស់ខ្លួន"។

ស្ថានទូតជប៉ុន ប្រចាំនៅប្រទេសចិន កាលពីថ្ងៃចន្ទ ក៏បានក្រើនរំលឹកពលរដ្ឋឱ្យគោរពទំនៀមទម្លាប់ក្នុងស្រុក និងរក្សាការប្រុងប្រយ័ត្នជានិច្ចក្នុងអន្តរកម្មរបស់ពួកគេជាមួយប្រជាជនចិន៕