អ្នកតាំងលំនៅឋានជនជាតិអ៊ីស្រាអែល បានបើកការវាយប្រហារដោយការលួចដុតទ្រង់ទ្រាយធំចំនួនពីរលើកនៅភូមិក្នុងដែនដីប៉ាឡេស្ទីនក្នុងពេលមានរលកនៃអំពើហិង្សាកើនឡើងដោយអ៊ីស្រាអែលនៅក្នុងតំបន់កាន់កាប់ West Bank ។

យោងតាមលោក Dhyab Masha'la ប្រធានក្រុមប្រឹក្សាមូលដ្ឋាន បាននិយាយថា អ្នកតាំងលំនៅរាប់សិបនាក់បានដើរចូលឆ្លងកាត់ភូមិ al-Jaba ស្ថិតនៅចម្ងាយ១០គីឡូម៉ែត្រ ភាគនិរតីទីក្រុង Bethlehem កាលពីថ្ងៃចន្ទ ដោយបានដុតផ្ទះពលរដ្ឋប៉ាឡេស្ទីនចំនួន៣ផ្ទះ ខ្ទមមួយ និងរថយន្តចំនួន៣គ្រឿង។

លោក Masha'la បានប្រាប់ទីភ្នាក់ងារសារព័ត៌មានប៉ាឡេស្ទីន Wafa ថា ក្រុមអ្នកវាយប្រហារបានបង្កការខូចខាតធ្ងន់ធ្ងរដល់ភូមិ ប៉ុន្តែអ្នកស្រុកបានជួយពន្លត់អណ្តាតភ្លើង ហើយពុំមានអ្នករងរបួសត្រូវបានគេរាយការណ៍ទេ។

កាលពីថ្ងៃចន្ទ សារព័ត៌មានWafa បាននិយាយថា អ្នកតាំងលំនៅបានដុតលំនៅឋានមួយខ្នង និងរថយន្តពីរគ្រឿង និងបានវាយប្រហារលើជនស៊ីវិលជាច្រើននាក់នៅក្នុងភូមិ Sa'ir ក្រោមការការពាររបស់កងកម្លាំងអ៊ីស្រាអែល។ ទីភ្នាក់ងារនេះបានរាយការណ៍ថា អ្នកតាំងលំនៅអ៊ីស្រាអែល បានវាយជនប៉ាឡេស្ទីនដោយដំបង និងឧបករណ៍មុតស្រួច បណ្តាលឱ្យមានរបួសដល់ស្ត្រីជាច្រើននាក់ ហើយកងកម្លាំងអ៊ីស្រាអែលបានរារាំងរថយន្តពន្លត់អគ្គិភ័យ និងរថយន្តសង្គ្រោះមិនឱ្យទៅដល់កន្លែងកើតហេតុ។

អំពើហិង្សានៅតំបន់ West Bank បានបំបែកកំណត់ត្រាថ្មីនៅឆ្នាំនេះ ដោយអ្នកតាំងលំនៅឋានបានធ្វើការវាយប្រហារស្ទើរតែរាល់ថ្ងៃលើជនប៉ាឡេស្ទីន ដែលរួមមានទាំងការសម្លាប់ ការវាយដំ និងការបំផ្លិចបំផ្លាញទ្រព្យសម្បត្តិ ដែលជារឿយៗស្ថិតក្រោមការការពាររបស់យោធាអ៊ីស្រាអែល។