ប្រធានគណៈកម្មការអឺរ៉ុប លោកស្រី Ursula von der Leyen កាលពីថ្ងៃចន្ទ (១៧ វិច្ឆិកា) បានប្តេជ្ញាស្វះស្វែងរក "វិធានការការពារផ្លូវច្បាប់បន្ថែមទៀត" សម្រាប់បែលហ្ស៊ិក ដើម្បីធានាថា ទីក្រុងព្រុចសែលនឹងមិនមែនជាអ្នករងគ្រោះពីលទ្ធភាពនៃការសងសឹករបស់វិមានក្រឹមឡាំង ប្រសិនបើសហភាពអឺរ៉ុប សម្រេចប្រើទ្រព្យសម្បត្តិរុស្ស៊ី ដែលត្រូវបង្កក ដើម្បីផ្តល់មូលនិធិឱ្យអ៊ុយក្រែន។

បណ្ដាមេដឹកនាំប្លុកអឺរ៉ុប បានព្រមព្រៀងគ្នាក្នុងជំនួបកំពូលមួយកាលពីខែតុលា ដើម្បីបំពេញតម្រូវការហិរញ្ញវត្ថុបន្ទាន់របស់អ៊ុយក្រែន សម្រាប់ពេល ២ឆ្នាំខាងមុខ ប៉ុន្តែបានរារែកលើផែនការប្រើទ្រព្យបង្កករបស់រុស្ស៊ី ដើម្បីផ្តល់កម្ចី ១៤០ពាន់លានអឺរ៉ូ ដល់ទីក្រុងគីវ ដោយសារតែក្ដីបារម្ភរបស់បែលហ្ស៊ិក។

បែលហ្ស៊ិក បានបដិសេធមិនគាំទ្រសំណើនេះទេ ដោយភ័យខ្លាចការសងសឹកផ្លូវច្បាប់ពីទីក្រុងមូស្គូ និងទាមទារឱ្យរដ្ឋសមាជិកផ្សេងទៀត ចែករំលែកហានិភ័យផ្នែកច្បាប់ និងហិរញ្ញវត្ថុ។ គួរឱ្យដឹងថា បែលហ្ស៊ិក កំពុងកាន់កាប់ទ្រព្យរបស់រុស្ស៊ី ដែលត្រូវបង្កកឬមិនអាចផ្លាស់ទីបាន រហូតដល់ ២៥៨ពាន់លានអឺរ៉ូ ហើយក៏ជាកន្លែងទុកទ្រព្យបង្កកភាគច្រើនរបស់រុស្ស៊ី។

ក្នុងលិខិតមួយផ្ញើទៅរដ្ឋជាសមាជិកកាលពីថ្ងៃចន្ទ លោកស្រី von der Leyen បាននិយាយថា អ៊ុយក្រែនត្រូវការប្រាក់ ១៣៥,៧ពាន់លានអឺរ៉ូ ក្នុងពេលពីរឆ្នាំខាងមុខ ដើម្បីរ៉ាប់រងទាំងតម្រូវការយោធា និងសារពើពន្ធ។ ក្នុងអនុស្សរណៈភ្ជាប់មកជាមួយលិខិតនោះ លោកស្រីបានគូសបញ្ជាក់ពីជម្រើសចំនួន៣ សម្រាប់មូលធនអឺរ៉ុប ក្នុងការផ្តល់មូលនិធិដល់អ៊ុយក្រែន រួមមាន ជំនួយទ្វេភាគី ឥណទានរួមរបស់ប្លុក ក៏ដូចជាការប្រើទ្រព្យសម្បត្តិរបស់ធនាគារកណ្តាលរុស្ស៊ី ដែលមិនអាចផ្លាស់ទីបាន នៅអឺរ៉ុប៕