ប្រជាជនក្រិករាប់ពាន់នាក់បានដើរដង្ហែក្បួនឆ្លងកាត់ទីក្រុង Athens កាលពីថ្ងៃចន្ទ ទី១៧ ខែវិច្ឆិកា ដើម្បីរំលឹកខួបនៃការបះបោររបស់និស្សិតដែលត្រូវបានបង្ក្រាបដោយហិង្សាក្នុងឆ្នាំ១៩៧៣ ដែលបានជួយផ្តួលរំលំរបបយោធាគ្រប់គ្រងក្នុងប្រទេសនេះ។ ការដើរដង្ហែក្បួនប្រចាំឆ្នាំទៅកាន់ស្ថានទូតសហរដ្ឋអាមេរិក ដែលប្រជាជនក្រិកជាច្រើន បានចោទប្រកាន់ពីការគាំទ្ររបបផ្តាច់ការយោធាឆ្នាំ ១៩៦៧-១៩៧៤ ជារឿយៗក្លាយជាចំណុចស្នូលសម្រាប់ការតវ៉ាប្រឆាំងគោលនយោបាយរបស់រដ្ឋាភិបាល។

នៅខាងមុខក្បួនដង្ហែកាលពីថ្ងៃច័ន្ទ យុវជនបានកាន់ទង់ជាតិប្រឡាក់ដោយឈាមរបស់និស្សិតដែលចូលរួមក្នុងការបះបោរឆ្នាំ១៩៧៣ នៅពហុបច្ចេកទេសទីក្រុង Athens ។ ពួកគេបានបង្វែរការហែក្បួននៅខាងក្រៅសភា ដើម្បីទៅគោរពដល់ជនរងគ្រោះនៃឧបទ្ទវហេតុរថភ្លើងឆ្នាំ២០២៣ ជាមហន្តរាយផ្លូវដែកដែលបានក្លាយជារូបភាពដ៏ឈឺចាប់នៃការបរាជ័យរបស់រដ្ឋ និងរដ្ឋាភិបាល។

ពួកគេបានច្រៀងចម្រៀងភ្លេងជាតិនៅពេលទៅដល់ស្ថានទូត ដែលត្រូវបានរារាំងដោយរថយន្តនគរបាលដាក់តម្រៀបជាជួរ។

នគរបាល បានដាក់ពង្រាយមន្ត្រីប្រហែល ៥.០០០ នាក់នៅក្រុង Athens ។ នគរបាល បាននិយាយថា មនុស្សជាង ៣០ នាក់ត្រូវបានឃុំខ្លួនមុនការហែក្បួន ហើយក្រោយមកទៀតមនុស្ស ១១ នាក់ត្រូវបានចាប់ខ្លួន។ ប្រជាជន បានដាក់កម្រងផ្កា និងផ្កា នៅពហុបច្ចេកទេសទីក្រុង Athens ជាកន្លែងនៃការបង្ក្រាបបង្ហូរឈាមនៅថ្ងៃទី១៧ ខែវិច្ឆិកា ឆ្នាំ១៩៧៣ នៅពេលដែលរថក្រោះរបស់កងទ័ពបានវាយលុកតាមច្រកទ្វារអគារដើម្បីបំផ្លាញការតវ៉ារបស់និស្សិត។