បាល់ទាត់៖ ក្លិប​​អង់គ្លេស Manchester City យកឈ្នះ​ក្លិប​ព័រទុយហ្កាល់ Sporting CP ៥​ទល់នឹង​០ វគ្គ ​១៦​ក្រុម​ចុងក្រោយ​ការប្រកួត​បាល់ទាត់​ជើងឯក​ក្លិប​កំពូល​អឺរ៉ុប (UEFA Champions League) ​យប់​ថ្ងៃ​ទី​១៥ ខែ​កុម្ភៈ​។​

​ជំនួប​នេះ​លេង​បានតែ​ ៧​នាទី​ទេ កីឡាករ Riyad Mahrez ស៊ុត​បញ្ចូល​ទី​ឱ្យ Man City នាំមុខ ១​ទល់នឹង​០ មុន​ពេល​ដែល​កីឡាករ Bernardo Silva ស៊ុត​គ្រាប់​ទី​២​ នាទី​ទី​១៧, កីឡាករ Phil Foden រកបាន​គ្រាប់​ទី​៣ ​នាទី​ទី​៣២ និង Silva ដដែល​បន្ថែម​គ្រាប់​ទី​៤ ​ឱ្យ​ក្រុម មុន​ចប់​តង់​ទី​១​។​ ​ការប្រកួត​នៅ​តង់​ទី​២ Man City នៅតែ​បង្ហាញ​ទម្រង់​លេង​ដ៏​ល្អរហូតដល់​នាទី​ទី​៥៨ កីឡាករ Raheem Sterling រកបាន​គ្រាប់​ទី​៥​ ឱ្យ​ក្រុម​។ នាទី​នៅ​សេសសល់​គ្មាន​ក្រុម​ណា​អាច​រក​គ្រាប់​បាល់​បាន​ទៀត​ទេ​។ ចប់​ការប្រកួត Man City ឈ្នះ ៥​ទល់នឹង​០​។ ជើង​ទី​២ ថ្ងៃទី​៩ ខែ​មីនា ក្លិប​ដែល​កំពុង​នាំមុខ​លី​គ​កំពូល​អង់គ្លេស Man City ទទួល Sporting វិញ​ម្តង​។​

​ថ្ងៃ​ជាមួយគ្នានេះដែរ នៅ​ទឹកដី​ទីក្រុង​ប៉ារីសប្រទេស​បារាំង ក្លិប​អ្នកមាន Paris Saint Germain ឈ្នះ​ក្លិប​អ្នកមាន​អេ​ស្ប៉ា​ញ Real Madrid ១​ទល់នឹង​០ ដោយ​គ្រាប់​បាល់​ចុង​ម៉ោងនាទី​ទី​៩០ បូក​៤ ​របស់​កីឡាករ Kylian Mbappé​។ ជើង​ទី​២ Real Madrid ត្រូវ​ទទួល PSG ថ្ងៃទី​៩ ខែមីនា ឆ្នាំ​២០២២​ នៅ​ទឹកដី Madrid៕

អត្ថបទ៖ គង់ ហួន