នាយករដ្ឋមន្ត្រីអ៊ីរ៉ាក់ លោកម៉ូហាម៉េដ សៀ អាល់ស៊ុដានី (Mohammed Shia' al-Sudani) បានជួបជាមួយស្ថាបនិកក្រុមហ៊ុនប្រេង Lukoil របស់រុស្ស៊ី លោក Vagit Alekperov កាលពីថ្ងៃចន្ទ ដើម្បីពិភាក្សាអំពីវិធីរក្សាស្ថិរភាពផលិតកម្មប្រេង បន្ទាប់ពីទណ្ឌកម្មរបស់សហរដ្ឋអាមេរិក បានរំខានដល់កិច្ចសន្យាវិនិយោគរបស់ក្រុមហ៊ុននេះ។

យោងតាមសេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយរបស់លោក អាល់ស៊ុដានី ការពិភាក្សា បានផ្តោតលើដំណោះស្រាយ ដើម្បីកាត់បន្ថយផលប៉ះពាល់នៃចំណាត់ការរបស់សហរដ្ឋអាមេរិកលើក្រុមហ៊ុន Lukoil ដែលបច្ចុប្បន្នផលិតបានប្រហែល ៤៨០,០០០ បារ៉ែលក្នុងមួយថ្ងៃ ពីតំបន់ប្រេង West Qurna-2 របស់ប្រទេសអ៊ីរ៉ាក់។

កិច្ចប្រជុំនេះ ក៏បានពិភាក្សាអំពីស្ថិរភាពនៃទីផ្សារផ្គត់ផ្គង់ប្រេងសកល និងសារៈសំខាន់នៃការជៀសវាងផលប៉ះពាល់អវិជ្ជមានណាមួយលើសមត្ថភាពរបស់អ៊ីរ៉ាក់ ក្នុងការចូលរួមចំណែកដល់ផលិតកម្មប្រេងសកល។

យោងតាមរបាយការណ៍ប្រព័ន្ធផ្សព្វផ្សាយជាច្រើន ក្រុមហ៊ុន Lukoil បានប្រកាសពីករណី មិនអាចគ្រប់គ្រងបាននៅតំបន់ប្រេង West Qurna-2 កាលពីដើមខែនេះ បន្ទាប់ពីទណ្ឌកម្មរបស់សហរដ្ឋអាមេរិក និងអង់គ្លេស បានបង្កកការទូទាត់ និងលុបចោលការបែងចែកប្រេងឆៅ។

នៅក្នុងសេចក្តីថ្លែងការណ៍នោះ លោក អាល់ស៊ុដានី បានសង្កត់ធ្ងន់ពីជំហររបស់ប្រទេសអ៊ីរ៉ាក់ទៅលើស្ថិរភាពទីផ្សារ ដោយបញ្ជាក់ពី «ការខ្នះខ្នែងរបស់ប្រទេសអ៊ីរ៉ាក់ក្នុងការរក្សាស្ថិរភាពនៅក្នុងទីផ្សារប្រេងសកល តាមរបៀបដែលការពារផលប្រយោជន៍របស់អ្នកផលិត និងអ្នកប្រើប្រាស់ ខណៈពេលដែលធានាថា ការ     ផលិតប្រេងរបស់អ៊ីរ៉ាក់ បន្តនៅកម្រិតស្ថិរភាព និងត្រូវបានអនុម័ត»៕