រដ្ឋមន្ត្រីសន្តិសុខជាតិអ៊ីស្រាអែល លោក Itamar Ben-Gvir បានអំពាវនាវឲ្យកម្ចាត់មន្ត្រីជាន់ខ្ពស់របស់អាជ្ញាធរប៉ាឡេស្ទីន និងចាប់ខ្លួនប្រធានអាជ្ញាធរប៉ាឡេស្ទីន លោក ម៉ាខ្មូដ អាបាស (Mahmoud Abbas) ក្នុងករណីដែលក្រុមប្រឹក្សាសន្តិសុខជាតិអង្គការសហប្រជាជាតិ អនុម័តសេចក្តីសម្រេចស្តីពីតំបន់ហ្កាហ្សា ដោយបើកផ្លូវឆ្ពោះទៅរកការបង្កើតរដ្ឋប៉ាឡេស្ទីន។

លោកបាននិយាយ ខណៈដែលបានដកស្រង់សម្តីដោយសេវាសារព័ត៌មានរបស់គណបក្សស្តាំនិយមជ្រុល Otzma Yehudit (កម្លាំងជ្វីហ្វ) របស់លោកថា៖«ខ្ញុំសូមអំពាវនាវដល់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ថា លោក ម៉ាខ្មូដ អាបាស និងមិត្តភក្តិភេរវកររបស់ខ្លួន ត្រូវតែដឹងថា ពួកគេមិនមានអភ័យឯកសិទ្ធិទេ។ ប្រសិនបើពួកគេពន្លឿនការទទួលស្គាល់រដ្ឋប៉ាឡេស្ទីនដែលជាភេរវករ ហើយអង្គការសហប្រជាជាតិទទួលស្គាល់រដ្ឋនេះនោះ អ្នកនឹងត្រូវចេញបញ្ជាឲ្យកម្ចាត់មន្ត្រីជាន់ខ្ពស់របស់អាជ្ញាធរប៉ាឡេស្ទីន ដែលជាភេរវករទាំង នៅពេលណាជួបពួកគេ និងចាប់ខ្លួនលោក ម៉ាខ្មូដ អាបាស ដែលត្រូវគេរង់ចាំ នៅក្នុងពន្ធនាគារ Ktziot»។

លោកបានកត់សម្គាល់ថា ការពិភាក្សាអំពីការបង្កើតរដ្ឋប៉ាឡេស្ទីន បានលេចចេញជាថ្មី ក្នុងរយៈពេលប៉ុន្មានថ្ងៃថ្មីៗនេះ។ លោកបានអះអាងថា៖«គំនិតផ្តួចផ្តើមនេះស្តាប់ទៅខុសគ្នានាពេលកន្លងទៅ ហើយសព្វថ្ងៃនេះ វាអាចទទួលបានកម្លាំងចលករថ្មីមួយ នៅក្នុងសំណើដែលបានដាក់ជូនទៅក្រុមប្រឹក្សាសន្តិសុខអង្គការសហប្រជាជាតិ ដែលត្រូវបានគេដាក់ឈ្មោះថា «មាគ៌ាឆ្ពោះទៅរកការសម្រេចចិត្តដោយខ្លួនឯងរបស់ប៉ាឡេស្ទីន»។ ប្រជាជនដែលបង្កើតថ្មី ដែលត្រូវបានគេហៅថា ប៉ាឡេស្ទីនមិនត្រូវមានរដ្ឋរបស់ខ្លួនទេ»៕