ក្រុមសិទ្ធិមនុស្សមួយបាននិយាយកាលពីថ្ងៃចន្ទ (១៧ វិច្ឆិកា) ថា មានជនជាតិប៉ាឡេស្ទីនយ៉ាងហោចណាស់ ៩៨នាក់ បានស្លាប់នៅក្នុងការឃុំឃាំងរបស់អ៊ីស្រាអែល ចាប់តាំងពីសង្រ្គាមតំបន់ហ្កាហ្សា ផ្ទុះឡើងក្នុងខែតុលា ឆ្នាំ២០២៣មក ដោយចោទប្រកាន់ថាមានការធ្វើទារុណកម្ម និងការធ្វេសប្រហែសផ្នែកវេជ្ជសាស្រ្ត ហើយអំពាវនាវឱ្យមានការស៊ើបអង្កេតពីអន្តរជាតិ។

ក្នុងរបាយការណ៍មួយដែលមានចំណងជើងថា "ការកាត់ទោសប្រហារជីវិតសម្រាប់ជនជាតិប៉ាឡេស្ទីននៅក្នុងការឃុំឃាំង" ក្រុមសិទ្ធិមនុស្សអ៊ីស្រាអែល PHRI បាននិយាយថា មនុស្សយ៉ាងតិច ៤៦នាក់ បានស្លាប់នៅក្នុងកន្លែងសេវាពន្ធនាគារអ៊ីស្រាអែល និងមនុស្ស ៥២នាក់ទៀត ស្លាប់នៅតំបន់ហ្កាហ្សាស្ទ្រីប ក្នុងការឃុំឃាំងដោយយោធា។

របាយការណ៍នេះនិយាយថា សកម្មភាពបែបនេះបានបន្ត បើទោះបីជាបទឈប់បាញ់នៅហ្កាហ្សា ត្រូវបានប្រកាសកាលពីខែតុលាក៏ដោយ។ ក្រុមសិទ្ធិមនុស្ស ដែលបង្កើតឡើងដោយគ្រូពេទ្យជនជាតិអ៊ីស្រាអែលមួយនេះ ព្រមានថា តួលេខអ្នកស្លាប់ជាក់ស្តែងអាចខ្ពស់ជាងនេះទៅទៀត។

ទាក់ទងនឹងរឿងនេះ អ្នកនាំពាក្យយោធាអ៊ីស្រាអែល បាននិយាយថា ការឃុំឃាំងរបស់ខ្លួនអនុវត្តតាមច្បាប់អ៊ីស្រាអែល និងច្បាប់អន្តរជាតិ ដោយទទួលស្គាល់ការស្លាប់របស់អ្នកជាប់ឃុំមួយចំនួន ដែលខ្លះកើតឡើងដោយសារជំងឺឬរបួសចាស់ ហើយនិយាយថា ករណីនីមួយៗត្រូវស៊ើបអង្កេតរួចទៅហើយ៕