មន្ត្រីសេតវិមាន កាលពីថ្ងៃចន្ទ (ទី១៧ ខែវិច្ឆិកា) បានប្រាប់ឲ្យដឹងថា លោកប្រធានាធិបតី Donald Trump មានឆន្ទៈក្នុងការចុះហត្ថលេខាលើច្បាប់ ដែលនឹងដាក់ទណ្ឌកម្មលើរុស្ស៊ី ដរាបណាលោកបន្តមានសិទ្ធិអំណាច ក្នុងការសម្រេចចិត្តចុងក្រោយលើវិធានការបែបនេះ។

គួរដឹងថា លោក Trump បានប្រាប់អ្នកសារព័ត៌មានកាលពីល្ងាចថ្ងៃទី១៦ ខែវិច្ឆិកាថា លោក «នឹងយល់ស្រប» ដែលគណបក្សសាធារណរដ្ឋកំពុងធ្វើការលើច្បាប់ ដើម្បីដាក់ទណ្ឌកម្មលើប្រទេសដែលធ្វើជំនួញជាមួយរុស្ស៊ី ពាក់ព័ន្ធនឹងការណ៍ដែលទីក្រុងមូស្គូមិនចរចាកិច្ចព្រមព្រៀងសន្តិភាពជាមួយអ៊ុយក្រែន។ ហើយជាមួយគ្នានេះ លោកបានបញ្ជាក់ទៀតថា សមាជិកសភាអាចនឹងទទួលយកការស្នើរបស់លោក ដើម្បីបន្ថែមអ៊ីរ៉ង់ទៅក្នុងវិធានការដាក់ទណ្ឌកម្មនេះ។

សមាជិកព្រឹទ្ធសភា លោក Lindsey Graham និងតំណាងរាស្ត្រអាមេរិក Brian Fitzpatrick ដែលទាំង ២នាក់ ជាសមាជិករបស់គណបក្សសាធារណរដ្ឋ បានគាំទ្រច្បាប់ដាក់ទណ្ឌកម្មលើប្រទេសដែលធ្វើអាជីវកម្មជាមួយរុស្ស៊ី ក្នុងនោះរួមទាំងប្រទេសទិញការនាំចេញថាមពលរបស់ទីក្រុងមូស្គូផងដែរ។

អ្វីដែលសំខាន់នោះ គឺថា ការអត្ថាធិប្បាយរបស់លោក Trump កាលថ្ងៃទី១៦ ខែវិច្ឆិកា អាចបើកផ្លូវឲ្យច្បាប់នេះមានវឌ្ឍនភាពនៅក្នុងសភា។ បណ្ដាមេដឹកនាំនៅក្នុងព្រឹទ្ធសភា និងសភាតំណាងរាស្រ្ដ បានផ្អាកមិនដំណើរការបោះឆ្នោតលើច្បាប់នេះ ខណៈដែលលោក Trump បានពេញចិត្តជាងនូវវិធានការដំឡើងពន្ធលើទំនិញនាំចូលពីឥណ្ឌា ដែលជាអ្នកទិញប្រេងរុស្ស៊ីធំជាងគេទី២ បន្ទាប់ពីប្រទេសចិន។

នៅពេលត្រូវបានសួរថា តើលោក Trump ឥឡូវនេះបានត្រៀមរួចហើយ ដើម្បីគាំទ្រច្បាប់នេះដែរ ឬទេ មន្ត្រីរូបនោះបានឆ្លើយថា «លោកនឹងចុះហត្ថលេខាលើច្បាប់នេះ។ លោកបានផ្តល់សញ្ញាបង្ហាញពីការត្រៀមរួចហើយ»៕