លទ្ធផលចុងក្រោយនៃការបោះឆ្នោត កាលពីថ្ងៃចន្ទ (ទី១៧ ខែវិច្ឆិកា) បានបង្ហាញថា ប្លុកនយោបាយរបស់លោកនាយករដ្ឋមន្ត្រី Mohammed Shia al-Sudani បានឈ្នះអាសនៈច្រើនជាងគេនៅក្នុងការបោះឆ្នោតរបស់ប្រទេសអ៊ីរ៉ាក់ ប៉ុន្តែការមានរដ្ឋាភិបាលថ្មី អាចចំណាយពេលច្រើនខែទៀត ដោយសារការប្រទាញប្រទង់គ្នា ដើម្បីបង្កើតបានសំឡេងភាគច្រើន។

រដ្ឋាភិបាលបន្ទាប់នឹងត្រូវស្វែងរកតុល្យភាពដ៏លំបាកមួយ រវាងឥទ្ធិពលរបស់សហរដ្ឋអាមេរិក និងអ៊ីរ៉ង់។ រដ្ឋាភិបាលនេះត្រូវតែគ្រប់គ្រងក្រុមប្រដាប់អាវុធរាប់សិបដែលជិតស្និទ្ធជាមួយអ៊ីរ៉ង់ និងដែលគោរពមេដឹកនាំរបស់ពួកគេជាជាងច្បាប់របស់រដ្ឋ ស្របពេលដែលកំពុងប្រឈមនឹងការមានសម្ពាធកាន់តែខ្លាំងឡើងៗពីទីក្រុងវ៉ាស៊ីនតោន ក្នុងការរំសាយអាវុធកងជីវពលទាំងនោះ។

គណៈកម្មការបោះឆ្នោត បានឲ្យដឹងថា គណបក្សរបស់លោក Al-Sudani បានឈរទី១ ក្នុងការបោះឆ្នោតនេះ ដោយទទួលបាន ៤៦អាសនៈ នៅក្នុងសភាដែលមានសមាជិកចំនួន ៣២៩រូប។

បើយោងតាមលទ្ធផលដែលចេញដោយគណៈកម្មការ បានឲ្យដឹងទៀតថា គណបក្ស Taqaddum ដែលទាញបានការគាំទ្រពីអ្នកកាន់សាសនាឥស្លាមនិកាយស៊ុននីភាគច្រើន នៅភាគខាងលិច និងភាគខាងជើងរបស់អ៊ីរ់ាក់ បានទទួលបាន ២៧អាសនៈ។ ចំណែកក្រុមចម្រុះ State of Law របស់អតីតនាយករដ្ឋមន្ត្រី លោក Nouri al-Maliki ទទួលបាន ២៩អាសនៈ ហើយគណបក្សប្រជាធិបតេយ្យឃើដ (KDP) ទទួលបាន ២៦អាសនៈ។

បើយោងតាមគណៈកម្មការនេះ បានឲ្យដឹងបន្ថែមថា ចំនួនអ្នកទៅបោះឆ្នោតសរុបចុងក្រោយ នៅក្នុងការបោះឆ្នោតសភារបស់ប្រទេសអ៊ីរ៉ាក់នេះ បានឡើងដល់ ៥៦,១១ភាគរយ៕