ការណែនាំរបស់ប្រទេសចិន ដែលហាមប្រាមមិនឲ្យធ្វើដំណើរទៅលេងជប៉ុន បានជំរុញប្រតិបត្តិករទេសចរណ៍ឲ្យលុបចោលជើងហោះហើរដែលបានកក់ទុកមុន និងការកក់សណ្ឋាគារ សម្រាប់អ្នកធ្វើដំណើរជាក្រុមក្នុងខែធ្នូ ហើយផ្អាកការធ្វើទីផ្សារនៃការធ្វើដំណើរបែបនេះទៅកាន់អ្នកស្រុក ខណៈដែលជម្លោះការទូតមិនបង្ហាញពីសញ្ញាថមថយ។

ប៉ុន្មានថ្ងៃបន្ទាប់ពីមានការព្រមាន អំពីសុវត្ថិភាព ដែលជាការឆ្លើយតបទៅនឹងការកត់សម្គាល់របស់នាយករដ្ឋមន្ត្រីជប៉ុន លោកស្រី Sanae Takaichi ជុំវិញបញ្ហាកោះតៃវ៉ាន់ យ៉ាងហោចណាស់ភ្នាក់ងារទេសចរណ៍របស់រដ្ឋចំនួន២ របស់ប្រទេសចិន បានលុបចោលការកក់ទុកជាក្រុមដែលបានធ្វើឡើងមុនខែ។ នេះបើយោងតាមបុគ្គលដែលដឹងពីបញ្ហានេះ។

ដោយសុំនិយាយក្នុងលក្ខខណ្ឌមិនបញ្ចេញឈ្មោះ នៅពេលធ្វើអត្ថាធិប្បាយលើប្រធានបទរសើបផ្នែកនយោបាយនេះ បុគ្គលទាំងនោះ បាននិយាយថា ចំណាត់ការសកម្មមុននេះ មានគោលបំណងការពារភ្នាក់ងារនានាកុំឲ្យជួបនឹងការខាតបង់នាពេលខាងមុខ ស្របពេលការផ្លាស់ប្តូរគោលនយោបាយ និងទស្សនៈស្ថិតក្នុងភាពមិនច្បាស់លាស់។ ពួកគេបានបញ្ជាក់ថា ការលុបចោលនេះត្រូវបានធ្វើឲ្យកាន់តែងាយស្រួលដោយការផ្តល់ជូនរបស់ក្រុមហ៊ុនអាកាសចរណ៍ចិន ក្នុងការលើកលែងថ្លៃលុបចោល និងអនុញ្ញាតឲ្យមានជម្រើសកក់ឡើងវិញដែលអាចបត់បែនបាន។

ក្រុមហ៊ុនជប៉ុនមួយចំនួន ក៏ចាប់ផ្តើមរងប៉ះពាល់ផងដែរ។ សណ្ឋាគារមួយឈ្មោះ Imperial Hotel បានឲ្យដឹងថា ខ្លួនបានចាប់ផ្តើមទទួលបានការជូនដំណឹង អំពីការពន្យារពេល និងការលុបចោល សម្រាប់ព្រឹត្តិការណ៍សាជីវកម្ម និងការស្នាក់នៅ៕